Halyqaralyq gimnastika federatsiiasy qossyraq jarysynyń júldegerlerin marapattaý rásimine keýdesine Z árpin jabystyryp kelgen reseilik gimnast Ivan Kýliakti bir jylǵa sporttan shettetti. Bul týraly federatsiianyń baspasóz qyzmeti málimdedi, - dep habarlaidy Tengrinews.kz.
Federatsiianyń tártiptik komissiiasy 20 jastaǵy sportshy Halyqaralyq gimnastika federatsiiasynyń jarǵysyn, onyń tártiptik jáne etikalyq kodeksterin, sondai-aq tehnikalyq reglamentterdi buzdy degen qorytyndyǵa kelgen. Kýliak qola júldeni jáne 500 shveitsariialyq frank kólemindegi aqshalai syilyqty qaitaryp, 2 myń frank kólemindegi sot shyǵyndaryn tóleýi kerek.
Oqiǵa biyl naýryzda kórkem gimnastikadan Dohada ótken álem kýbogy kezeńinde bolǵan. Sol kezde sporttyq gimnastikadan jasóspirimder arasyndaǵy Resei chempiony parallel qossyraqtan qola júlde jeńip alǵan.
Marapattaý rásiminen túsirilgen kadrlarda Kýliaqtiń kiimine Z árpi jabystyrylǵany kórsetilgen. Z jáne V áripteri Resei áskeriniń Ýkrainaǵa basyp kirýiniń simvoly retinde belgili. Olar kóbine reseilik áskeri tehnikaǵa jazylady.
"Bilesiz be, ol bizben aqyldaspady. Bul onyń jeke bastamasy ekeni sózsiz. Bizdiń jigitter - Reseidiń patriottary. Ol bizge eshteńe aitpady", - dedi sporttyq gimnastikadan Resei quramasynyń aǵa bapkeri Valentina Rodionenko.
Ýkrainada soǵys bastalǵannan keiin kóptegen halyqaralyq uiym reseilik jáne belorýs sportshylaryn jarystarǵa qatysýdan shettetken. Keibirin, mysaly, shahmatshy Sergei Kariakin men júzýshi Evgenii Rylov Reseidiń Ýkrainaǵa basyp kirýin ashyq qoldaǵany úshin jeke jazaǵa ushyraǵan.
