Resei prezidenti Vladimir Pýtin eńbek migranttaryna merzimi ótip ketken patentpen 15 maýsymǵa deiin jumys isteýge múmkindik beretin jarlyqqa qol qoidy. Jarlyq Kreml saitynda jariialandy.
Qujat jumys berýshilerge merzimi ótip ketken patenti bar eńbek migranttaryn jaldaýǵa múmkindik beredi. Quqyq qorǵaý organdary mundai jaǵdaida migranttarǵa ákimshilik aiyppul salmaýy tiis. Buǵan qosa, deportatsiialaý, vizanyń kúshin joiý, ruqsat qaǵazyn tartyp alý siiaqty sharalar qoldanbaýy tiis.
Buǵan deiin eńbek migranttary Resei biliginen koronavirýsqa bailanysty jariialanǵan karantin ýaqytynda eńbek patentin tóleýdi keiinge shegerýdi suraǵan.
2019 jyldyń sońyndaǵy málimet boiynsha, Máskeý qalasynda shetel azamattaryna 463,7 myń eńbek patenti berilip, qala biýdjetine 18,3 mlrd rýbl kóleminde tabys túsken. Patentterdiń jartysy - Ózbekstan azamattaryna, 38 paiyzy Tájikstan azamattaryna berilgen.
Eýraziia ekonomikalyq odaǵyna (EAEO) múshe Qazaqstan jáne Qyrǵyzstan azamattarynan eńbek patenti suralmaidy.
