Resei jaqyn ýaqytta Belarýske memlekettik kredit berýdi josparlap otyr, dep málimdedi Resei prezidenti Vladimir Pýtin belarýstik áriptesi Aleksandr Lýkashenkomen kezdesýinde. Bul týraly RIA Novosti habarlady, dep jazady Sputnik agenttigi.
Áńgimelesý kezinde Resei prezidenti Máskeý Minskige 1,5 milliard dollarǵa kredit beretinin, qazir qarjy ministrleri jumys istep jatqanyn jetkizdi.
"Resei jaqyn arada Belarýske berýdi josparlap otyrǵan kreditti kezdeisoq eske salyp otyrǵan joqpyn, bul qarjy naryǵynda da kórinis tabady dep senemin", - dedi Pýtin kelissózder kezinde.
Resei prezidenti sonymen qatar Resei men Belarýs aýmaǵynda jyl ishinde áskeri is-sharalar ótkizý qarastyrylǵanyn málimdedi.
"Aleksandr Grigorevich, áskerge qatysty durys aityp otyryz, bizde jospar bar, ol júzege asyrylady. Bir jyl ishinde Belarýs aýmaǵynda da, Resei aýmaǵynda da ai saiyn is-sharalar ótkizemiz. Buryn qalai josparlansa, solai bolady", - dedi Pýtin kezdesýde.
Sondai-aq, Resei basshysy málimdegendei, Resei men Belarýs kóptegen salada óte tereń yntymaqtastyq ornatqan, elder pandemiiaǵa bailanysty tómendegen saýda ainalymyn qalpyna keltirýi kerek.
"Aitpaqshy, koronavirýs bizdiń taýar ainalymymyzǵa áser etti, ókinishke qarai, búkil álemde solai bolyp jatyr, saýda ainalymynyń deńgeii tómendedi. Biraq osyǵan bailanysty, biz burynǵy daǵdarysqa deiingi saýda ainalymy men ekonomikalyq qatynastardyń deńgeiin qalpyna keltirip qana qoimai, alǵa jyljýdyń alǵysharttaryn jasaý úshin qosymsha kúsh salýymyz kerek dep sanaimyn", - dedi Pýtin.
Ol kelissózder barysynda osyǵan nazar aýdarýdy usyndy.
