2018 jyly Baiqońyrdaǵy apat boiynsha Resei jaǵy ótemaqy tólegen joq. Bul týraly Parlament Májilisiniń jalpy otyrysynda Qazaqstan Syrtqy ister ministriniń orynbasary Marat Syzdyqov málim etti, dep habarlaidy "Ult aqparat".
«Osyndai tiisti kelisim (ótemaqy týraly) bar. Resei tarapy keltirilgen shyǵyndy tóleý sekildi kepildikti ózine alady. Alaida tájiribe júzinde bul óte uzaq protsess ekenin kórip otyrmyz. Osy oraida túrli biýrokratiialyq tustar kezdesip jatyr», - dedi Syzdyqov.
Bul rette ol 2018 jyly Baiqońyrdaǵy apatty mysal retinde keltirdi.
«2018 jyly bolǵan apat boiynsha materialdyq ótemaqy áli de tólenbedi», - dedi ministrdiń orynbasary.
Eske sala keteiik, 2018 jyly 11 qazanda Baiqońyr ǵarysh ailaǵynyń Gagarin start alańynan orbitaǵa basqarylatyn kóliktik «Soiýz MS-10» kemesin alyp shyǵýy tiis «Soiýz FG» zymyran tasyǵyshy ushyryldy. Biraq start berilgen soń birneshe minýttan keiin Roskosmos saityndaǵy tikelei kórsetilim úzilip, diktor «zymyran tasyǵyshtyń apatqa ushyraǵanyn» habarlaǵan edi.
