Ýkraina bas prokýratýrasy 13 maýsymda taratqan málimetke qaraǵanda, Resei áskeri Ýkrainaǵa basyp kirgeli beri kem degende 288 bala oqqa ushyp, 527 bala jaralanǵan.
Bas prokýratýra muny ázirge qolda bar aqparat dep sanaidy, soǵys qimyldary júrip jatqan aimaqtardan tolyq aqparat jinaý múmkin bolmaǵan.
Keiingi kúnderi oqqa ushqan balalar arasynda Lýgansk oblysyna qarasty Lisichansk eldimekeniniń 6 jasar sábii bar. Ol 12 maýsymda Resei áskeri artilleriiamen atqylaǵan kezde ólgen. 11 maýsymda Resei áskeri Ternopol oblysyndaǵy Chertkov qalasyn atqylaǵanda 12 jasar qyz zardap shekken.
Birikken ulttar uiymynyń adam quqyǵy jóngindegi joǵarǵy komissary basqarmasynyń ótken aptadaǵy esebine qaraǵanda, Resei áskeri basyp kirgeli 272 bala, 4 myń 302 beibit adam qaza bolyp, 5217 adam jaralanǵan. Ol kezde Donetsk jáne Lýgansk oblystarynda 2493 adam ólip, 2979 adam jaralanǵany habarlanǵan. Bul oblystardyń Kiev baqylap otyrǵan aimaqtarynda 2339 adam ólip, 2326 adam jaralanǵan.
Ólim-jitimniń kóbi artilleriia jáne dúrkindetip atatyn zymyran júiesiniń shabýylynan keiin bolǵan.
BUU basqarmasy ólgender munan áldeqaida kóp bolýy múmkin ekenin, soǵys aimaqtarynan aqparat kesh jetip jatqanyn eskertken. Ásirese Mariýpol, Iziým jáne Popasnaia qalalarynda beibit adamdardyń qyrylyp jatqany jaily habar jiilegen.
