Foto: aa.com.tr
Resei áskeri Lýgansk jáne Harkov oblysynyń shekarasynda iri shabýylǵa kóshti. Amerikanyń Soǵysty zertteý institýtynyń (Institute for the Study of War) kún saiynǵy esebinde osyndai tujyrym jasalady, dep habarlaidy Azattyq radiosy.
Ashyq derekkózderge súiengen ISW sarapshylarynyń tujyrymdaýynsha, Resei áskeri Kýpianskige jaqyn Svatovo-Kremennaianyń barlyq aýmaǵynda shabýylǵa kóshken.
ISW málimetinshe, buǵan osy aýdanda Reseidiń keminde úsh iri diviziiasy shabýylǵa jumyldyrylǵany dálel bola alady.
Institýttyń málimetine qaraǵanda, shabýylǵa 144-shi jáne 3-motoatqyshtar diviziiasynyń birneshe polki qatysyp jatyr. Operatsiiaǵa 76-shy áýe-desant diviziiasy men ońtústik áskeri okrýg bólimderi de atsalysqan.
Alaida reseilik topqa barlyq rezerv qosylyp úlgermegen.
Áskeri sarapshylardyń aitýynsha, shabýyl faktisiniń ózi osy aýmaqta Resei armiiasynyń byltyr tamyzda aiyrylǵan basymdyǵyn qalpyna keltirgenin kórsetedi. Alaida shabýyl bastalsa da, bul ol sátti ótedi degendi bildirmeidi.
"Áskeri men tehnikasyn qalpyna keltirgen soń, Ýkrainada basymdyqty qaitaryp, kontrshabýylǵa kóshý múmkindigi paida bolady" deidi ISW sarapshylary.
Amerikanyń barlaý qyzmeti men Batys sarapshylary jyl basynan beri Máskeý "ýkrain armiiasynda oq-dári bitkenin paidalanyp, aldaǵy aptalarda jańa shabýylǵa kóshedi" degen boljam aitqan. Keiingi kúnderi Resei Ýkrainaǵa jańa tehnika kelmei turyp, shabýyldy bastap ketedi degen boljam jii aitylǵan edi.
Ótken aptada Lýgansk oblysynyń áskeri ákimshiliginiń jetekshisi Sergei Gaidai Resei armiiasy Ýkrainanyń Lýgansk oblysyna áskeri tehnika men soldattaryn ákelip jatyr, 15 aqpannan keiin aimaqtyń batysynda shabýyl bastaýǵa ázirlik ústinde dep habarlaǵan. Financial Times basylymyna da qupiia derekkóz sol merzimdi aitqan.
Ýkraina prezidenti Vladimir Zelenskii 5 aqpan kúngi málimdemesinde Resei armiiasy aqpanda "byltyrǵy jeńilisterin osylaisha jýyp-shaimaqshy" degen. Ýkraina qorǵanys ministri Aleksei Reznikov te sol kúni Resei basqynshylyǵyna bir jyl tolar kezde Resei armiiasy shabýyl jasaýy múmkin dep topshylaǵan.
Máskeý bul aqparatqa qatysty túsinikteme bermedi.
