Saiasattanýshy, Eýraziialyq intergatsiia institýtynyń direktory Orazǵali Selteev Memleket basshysy Qasym-Jomart Toqaevtyń Resei Federatsiiasyna saparyndaǵy ýaǵdalastyqtar týraly pikir bildirdi, dep habarlaidy QazAqparat.
«Prezidenttiń Reseige aparǵan memorandýmdary men kelisimderine qarap-aq, jalpy osy baǵyttar boiynsha ishki yntymaqtastyqtyń mańyzdy ekeni túsinikti jáne bul jerde, eń aldymen, jurtshylyqty qyzyqtyratyny – iadrolyq energetika salasynda kadr daiarlaý dep oilaimyn. Iaǵni, bul qazirgi álemdegi eń suranysqa ie baǵyttardyń biri ekenin túsiný kerek», - dedi Orazǵali Selteev agenttik tilshisine bergen suhbatynda.
Óz sózinde spiker Frantsiianyń alty jańa atom stansasyn salýdy josparlap otyrǵanyn jáne barlyq jetekshi memleketter beibit atomdy damytýǵa qarjy salyp jatqanyn aitty.
«Sondyqtan, osy turǵydan alǵanda iadrolyq energetika mamandaryn daiarlaý jónindegi reseilik ǵylymi-bilim berý júiesi ne degenmen aldyńǵy qatarly bolyp sanalady jáne osy júie boiynsha oqytylatyn mamandar kem degende taǵy 100 jyl álemdik deńgeide suranysta bolatynyn túsiný kerek, sondyqtan bul óte mańyzdy. Ekinshi másele – Qazaqstanda AES salýmen bailanysty. Bul másele talqylanýǵa da kelmeidi, óitkeni búginde búkil el boiynsha energiia tapshylyǵy problemasy bar jáne negizgi sheshimderdiń biri – AES salý bolyp otyr. Bul jerde Reseidiń atom stantsiiasyn salýǵa negizgi úmitkerlerdiń biri ekenin tikelei aitý kerek. Biraq ázirge munyń bári ázirleý, memorandým jasaý, talqylaýlar, kelisimder satysynda, sodan keiin ǵana jumystardyń qalai jáne qai baǵytta damityny anyq kórinedi», - dedi Orazǵali Selteev.
