Resei 22 jyl buryn jalǵa alǵan jerlerdi Qazaqstanǵa qaitarýy tiis. Bul - 300 myń gektardan asa aýmaqty alyp jatqan Aqtóbe oblysyndaǵy Embi áskeri poligony.
Mundai jarlyqty Májilis depýtattary maquldady, - dep habarlaidy "Astana" telearnasy. Jalǵa alý kelisiminiń merzimi 2017 jyldyń 1 qańtarynda aiaqtalǵan.
Qorǵanys ministri orynbasarynyń aitýynsha, poligondy Qazaqstanǵa qaitarý úshin arnaiy komissiia qurylady. Qazaqstannyń mindetterdi oryndaý máselesinde reseilik tarapqa shaǵymy da joq eken.
"Poligondy jaldan shyǵarý óńirdiń ekonomikalyq damýyna oń áserin beredi, qaitarylatyn jerler kásipkerlerdiń múddesine paidalanylýy múmkin, munda aýyl sharýashylyǵymen, paidaly qazbalardy izdeý jáne óndirýdi uiymdastyrý isterimen ainalysatyndarǵa qolaily. Osy arqyly memlekettik biýdjetke jańa qainarkózden tabys túsedi. Poligonnyń telimderi áleýmettik mańyzy bar infraqurylymdyq jobalardyń qurylysyna paidalanylýy múmkin", - dedi Talǵat Muhtarov.
Ministrdiń orynbasary biraz ýaqyt buryn reseilik taraptyń Qazaqstanǵa poligonda ornalasqan jyljymaityn jáne ornyqty múliktiń barlyǵyn ótkizip qoiǵanyn aitty. Onyń ishinde turǵyn-kazarmalyq qordyń 15 ǵimaraty bar.
Eske salaiyq, 1960 jyldyń 10 mamyrynda Embi-5 áskeri qalashyǵy qurylǵan edi. Poligonda áýe zymyran PVO CB, "Krýg", "Kýb", "Býk" , "TOP", "Osa", "S-300B", "Týngýsskoi" áýe qorǵanys S.V. jedel taktikalyq qysqa aýqymdy zymyran synaldy.
Resei jyl saiyn Qazaqstanǵa osy maqsatta aitarlyqtai aqsha tólep turǵan. Máselen, ótken jyly 7 milliard teńge shamasynda qarajat túsken.
