Ulybritaniia qorǵanys ministri Djon Hili mingen Koroldik áýe kúshteriniń ushaǵy Resei shekarasyna jaqyn mańda GPS signalyn joǵaltqan. Osy jaǵdaiǵa bailanysty ekipaj úsh saǵatqa sozylǵan ushý kezinde balama navigatsiialyq júieni paidalanýǵa májbúr boldy, dep ult.kz tilshisi dalanews.kz saityna silteme jasap habarlaidy.
Britandyq Press Association agenttiginiń málimetinshe, oqiǵa Djon Hili Estoniiadaǵy britan áskeri qyzmetkerlerimen kezdesýden keiin Ulybritaniiaǵa qaityp bara jatqan kezde bolǵan. Bul jait týraly alǵash bolyp The Times basylymy jazdy.
Aldyn ala aqparatqa qaraǵanda, ushaqtyń GPS signaly Resei shekarasyna jaqyn jerde ádeii buǵattalǵan bolýy múmkin. Britandyq BAQ bul jaǵdaiǵa Reseidiń qatysy bolýy yqtimal degen boljam aitýda. Degenmen Resei tarapy ázirge bul málimetke qatysty resmi pikir bildirgen joq.
Habarlanǵandai, GPS júiesi búkil ushý barysynda qoljetimsiz bolǵan. Sol sebepti ushqyshtar áýe kemesin basqarý úshin basqa navigatsiialyq quraldarǵa súiengen. Alaida Ulybritaniia qorǵanys ministriniń dál osy árekettiń nysanasy bolǵany nemese bolmaǵany naqty belgisiz.
The Times dereginshe, ushaqtyń baǵyty áýe kemelerin baqylaýǵa arnalǵan ashyq platformalarda kórinip turǵan. Bortta ministrden bólek, fotograftar men jýrnalist te bolǵan.
Jolaýshylarǵa Dassault Falcon 900LX ushaǵynyń qaýipsizdigine eshqandai qaýip tónbegeni aityldy. Soǵan qaramastan bul oqiǵa Ulybritaniiada alańdaýshylyq týǵyzdy.
Ulybritaniia Qorǵanys ministrligindegi aty-jónin atamaǵan derekkóz jaǵdaidy «Resei tarapynan jasalǵan abaisyz aralasý» dep sipattaǵan. Onyń aitýynsha, britandyq áýe kúshteri mundai yqtimal áreketterge qarsy turýǵa daiyn.
