«Qazaqstan Temir joly» UK» AQ Jambyl oblysynda relsten shyǵyp ketken júk vagondary týraly pikir bildirdi, dep habarlaidy QazAqparat tilshisi.
«Aldyn ala boljam boiynsha, 28-shi vagonnyń búiir ramasynyń synýy poiyzdyń apatqa ushyraýyna ákep soqqan. Bul ramany «Azov Elektrostal» zaýyty 2009 jyly shyǵarǵan. Jalpy eseppen 11 vagon relsten shyqty, barlyǵyna ken qazbalary, aǵash tielgen. Bul vagondardyń ieleri - qazaqstandyq, reseilik jáne estoniialyq kompaniialar», - dedi «QTJ» UK» AQ vitse-prezidentiniń mindetin atqarýshy Marat Shákenov QTJ ǵimaratynda ótken brifingte.
Onyń aitýynsha, atalǵan jol bóligindegi qozǵalys tolyq qalpyna keltirildi jáne poiyzdardyń júrýine esh shekteý bolmaýy tiis.
Eske sala ketsek, Saryshaǵan stansasynda júk poiyzynyń vagondary (Qashqanteńiz-Jastar aralyǵyndaǵy Moiynty-Shyǵanaq bóliginde kele jatqan №2009 poiyz) relsten shyǵyp ketip, bes jolaýshy poiyzynyń qozǵalysy toqtatylǵan edi. Oqys oqiǵadan eshkim zardap shekpedi.
Vagondardyń relsten shyǵyp ketýine «Istkomtrans» JShS-na tiesili 28-vagonyndaǵy búiir ramasynyń synyp ketýi sebep bolǵan.
Zańǵa sáikes, barlyq keltirilgen shyǵyndy júk vagonynyń iesi óteidi. Sondai-aq, apat saldarynan ýaqytsha toqtatylǵan 5 poiyzdyń jolaýshylaryna ótemaqy tólenedi.
Eske sala ketsek, maýsym aiynda Jambyl oblysynda «Astana-Almaty» baǵytyndaǵy poiyzdyń 8 vagony relsten shyǵyp, bir jasóspirim mert bolǵan edi.
