11 shildede Qazaqstanda 3899 adamnyń analizinen koronavirýs anyqtaldy. Bul buryn-sońdy tirkelmegen eń joǵary kórsetkish. Keiingi aptalarda koronavirýs juqqandar úzdiksiz artyp keledi.
Ásirese Nur-Sultan, Almaty qalasy, Qaraǵandy, Atyraý men Batys Qazaqstan oblystarynda virýs kúsheigen. Ótken táýlikte Nur-Sultanda 950 adamnyń koronavirýs testi oń shyqqan. Almatyda – 638, Qaraǵandy oblysynda – 603, Atyraý oblysynda – 290, Shymkentte – 264, Batys Qazaqstan oblysynda – 215, Aqmola oblysynda – 139, Mańǵystaý oblysynda – 126, Pavlodar oblysynda 142 naýqas tirkeldi. Qalǵan oblystarda anyqtalǵan naýqastar júzge jetpeidi.
Qazir "jasyl aimaqta" Túrkistan men Shyǵys Qazaqstan oblysy ǵana qalǵan. Tórt oblys: Soltústik Qazaqstan oblysy, Almaty oblysy, Jambyl men Qyzylorda oblystary – "sary aimaqta". Nur-Sultan, Almaty, Shymkent qalalary, Pavlodar, Atyraý, Qaraǵandy, Aqmola, Qostanai, Aqtóbe, Mańǵystaý, Batys Qazaqstan oblystary "qyzyl aimaqta" tur. Algoritmge sáikes, "qyzyl aimaqtarda" karantin kúsheiedi.
Resmi málimet boiynsha, Qazaqstanda 2020 jyldyń naýryz aiynan beri 458 724 adamnyń koronavirýs testi oń shyqqan. 4681-i qaitys bolǵan. Buǵan koronavirýs juqtyryp qaitys bolǵan 2367 adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Úkimet byltyr tamyzdan beri PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebin júrgizip keledi. 10 shildege deiin 57 900 adam pnevmoniianyń osy túrine shaldyqqan (10 shildede 40 adamnyń pnevmoniiaǵa shaldyqqany anyqtaldy), 3492-si qaitys bolǵan. Bilik bul derekti koronavirýstyń negizgi statistikasyna qospai otyr.
10 shildede 37 adam koronavirýstan qaitys bolǵan: 34 adam – koronavirýstan, 3 adam koronavirýs pnevmoniiasynan kóz jumdy dep aitylady.
Qazir Qazaqstan boiynsha 41 myń adam koronavirýstan emdelip jatyr. 13 myńy statsionarda jatyr. 126 adam jasandy tynys apparatyna qosylǵan.
Keiingi aptalarda elde indettiń kúrt kúsh alǵany baiqalady. Bilik organdary muny "delta variantymen" bailanystyrady. Úndistanda anyqtalǵan bul variant Qazaqstanda alǵash ret maýsymnyń sońynda tirkelgen. Jańa varianttyń alǵashqy variantqa qaraǵanda edáýir juqpaly.
Qazaqstanda aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 372 myń adam vaktsinanyń keminde bir dozasyn alǵan. 2 mln 442 myń adam vaktsinanyń eki dozasyn alǵan.
