Qylmystyq júieni modernizatsiialaýda úsh deńgeili modelge kóshsek, sottardyń negizgi formaty elektrondy bolady.
Bul týraly «Qazaqstandaǵy quqyq qorǵaý jáne sot júiesin jańǵyrtýdyń ózekti máseleleri» atty halyqaralyq dóńgelek ústel barysynda QR Bas prokýrorynyń orynbasary Marat Ahmetjanov aitty, dep habarlaidy QazAqparat.
«Táýelsizdik alǵan kúnnen bastap Qazaqstan quqyq qorǵaý salasynda júieli jumys júrgizilip keledi. Bul eldegi turaqtylyq pen qaýipsizdiktiń joǵary deńgeiin qamtamasyz etedi. Bas bostandyǵynan aiyrý jazasy asa qaýipti qylmyskerlerge taǵaiyndalady. Eger 90-jyldardyń basynda bizdiń túrmelerde 100 myńnan astam adam jazasyn ótegen bolsa, búginde olardyń sany 30 myń. Osy reformalar zańdy odan ári nyǵaita tústi»,- dedi QR Bas prokýrorynyń orynbasary Marat Ahmetjanov.
Sonymen qatar, ol Prezident quqyq qorǵaý, qadaǵalaý jáne sot organdary arasynda jaýapkershiliktiń naqty bolýyn atap ótkenin tilge tiek etti.
«Azamattarymyzdyń konstitýtsiialyq quqyqtarynyń qorǵalýyn jáne olardyń bilik institýttaryna degen senimin nyǵaitý úshin júieli reformalar qajet. Qylmystyq is júrgizýde prokýrordyń orny erekshe. Ol jinaqtalǵan materialdarǵa táýelsiz baǵa berip, negizgi protsessýaldyq sheshim qabyldaidy. Al politsiia qylmyskerlerdi ustap, dálelder jinaidy. Sot óz kezeginde tóreligin júzege asyrady. Bul tásil sotqa deiingi tergep-tekserýdiń alǵashqy satylarynan bastap zańbuzýshylyqtarǵa kedergi. Bul júieni postkeńestik elder engizdi», - dedi ol.
Memleket basshysy 1 qyrkúiektegi halyqqa joldaǵan Joldaýynda úsh satyly qylmystyq sot tóreligi kýrsyn engizýdi aitqan bolatyn.
«Biz barlyq máselelerdi jan-jaqty talqyladyq. Parlament qabyldaǵan jáne 19 jeltoqsanda Memleket basshysy qol qoiǵan Qylmystyq is júrgizý kodeksine túzetýlerdi ázirledik. Onda kezeńderi kórsetilgen. Birinshi kezeńde prokýrorlar bizdiń tergeýshilerimizdiń negizgi protsessýaldyq sheshimderi týraly kelisedi. Sondai-aq, prokýror tergeý organdarynyń qylmystyq isti toqtatý týraly barlyq sheshimderine zańdy kúsh beredi. Qylmysqa qatysty hattamalarǵa buiryq shyǵarylady. Sodan keiin sotqa jiberedi. Sondyqtan bul zań kúshine engen sátten bastap prokýrordyń kelisiminsiz kez kelgen protsessýaldyq sheshimniń zańdy kúshi bolmaidy», - dedi Marat Ahmetjanov.
Onyń aitýynsha, jańa tetikter zańbuzýshylyqtardy erte satysynda anyqtaýǵa jáne onyń jolyn kesýge múmkindik beredi. Bul azamattardyń quqyqtaryn qorǵaýdy kúsheitedi.
«Qazir prokýratýra organdarynda qaita qurý júrip jatyr. Bul prokýrorlardyń jaýapkershiligin arttyrady, sonymen qatar jańa kadrlardy daiarlaýǵa múmkindik beredi. Bul qylmystyq protsestiń aldaǵy ýaqyttaǵy úsh deńgeili modeline kóshýge óz septigin tigizedi», - dep atap ótti spiker.
Aita keteiik, Qazaqstanda barlyq tirkelgen qylmystyq isterdiń 42% -y elektrondy túrde tergelip jatyr. Júie politsiia basshylyǵyna jáne prokýratýraǵa tergeýdiń barysyn onlain rejiminde baqylaýǵa múmkindik beredi. Úsh deńgeili modelge kóshý arqyly elektrondy is júrgizý bolashaqta qylmystyq sottardyń negizgi formatyna ainalmaq.
