© Sputnik / Abzal Kaliev
Prezident Qasym-Jomart Toqaev referendýmnyń oń nátijesi shyqqan jaǵdaida biraz jumys atqarý qajet bolatynyn málimdedi, dep habarlaidy Sputnik Qazaqstan.
"Aldymyzda biraz jumys bar. Búgin daýys berip jatqan Konstitýtsiia baptaryn iske asyrýymyz kerek. Zańnamaǵa ózgerister engizý qajet. Atap aitqanda, partiia men Parlamentke qatysty túzetýler bar. Menińshe, bizdiń Parlamentimiz ol jumysty abyroimen atqara alady. Búgin halqymyz daýys berip jatqan jańalyqtar elimizdiń qoǵamdyq ómirine kóptegen ózgeris ákeledi. Shyn máninde, memleket pen qoǵam arasyndaǵy qarym-qatynas paradigmasy ózgeredi. Adam quqyqtary birinshi orynǵa shyǵady", - dedi Toqaev referendým aiasynda ótken brifingte.
Osy oraida Prezident Konstitýtsiiaǵa engiziletin túzetýler boiynsha Adam quqyqtary jónindegi ýákilge jańa mártebe beriletinin erekshe atap ótti. Al Memleket basshysy halqyna adal qyzmet etýge jáne Konstitýtsiiany qatań saqtaýǵa mindetti. Toqaev ony basty qaǵida retinde ustanatynyn jetkizdi.
"Aldymyzda turǵan maqsatymyz, jumysymyz óte aýqymdy. Bárimiz ult bolyp, el bolyp, jumys isteýimiz kerek. Elimizdiń qaýipsizdigine tónetin qaýip-qater az emes. Sondyqtan elimiz óte qyraǵy bolýy kerek. Bárimiz bir judyryq bolyp, qaýip-qaterge toitarys berýimiz kerek", - dep atap kórsetti Toqaev.
