Respýblikalyq referendýmǵa úgit-nasihat erejelerin buzǵandarǵa aiyppul salynady, dep habarlaidy QazAqparat.
QR Aqparat jáne qoǵamdyq damý vitse-ministri Nurgúl Maýberlinovanyń aitýynsha, azamattar men qoǵamdyq birlestikterge referendýmǵa shyǵarylǵan másele boiynsha óz pikirin bildirý quqyǵyna kepildik beriledi.
Búkil úgit materialdarynda ony shyǵarǵan uiym, olardyń basylǵan jeri men taralymy, olardy shyǵarýǵa jaýapty adamdar týraly málimet bolýy tiis.
«Anonimdik úgit materialdaryn taratýǵa tyiym salynady. Avtory nemese osy materialdardy shyǵarǵan uiymdar týraly aqparaty joq materialdar anonimdi bolyp sanalady», - dedi vitse-ministr Ortalyq sailaý komissiiasynda ótken otyrysta.
BAQ-ta jariialanǵan barlyq materialdar zań talaptaryna sai bolýy tiis.
Referendým týraly zańda kórsetilgendei, referendýmnyń aldyndaǵy kúni jáne referendým kúni úgit júrgizýge tyiym salynady.
«Referendýmǵa daiyndyq kezeńinde quqyqqa qaishy kontentti anyqtaý algoritmine sáikes BAQ pen áleýmettik jelilerde monitoring júrgiziledi. Zańbuzýshylyq belgileri bar materialdar odan ári shara qabyldaý úshin Bas prokýratýraǵa jiberiledi», - dedi N. Maýberlinova.
Bas prokýror orynbasary Bolat Dembaevtyń aitýynsha, anonim úgit materialdaryn taratqany úshin ÁQBtK 113-baby boiynsha ákimshilik jaýapkershilik qarastyrylǵan (25 AEK mólsherinde aiyppul).
«Respýblikanyń konstitýtsiialyq qurylysyn kúshtep ózgertýge, onyń tutastyǵyn buzýǵa, memleket qaýipsizdigine nuqsan keltirýge, áleýmettik, násildik, ulttyq, dini, tektik-toptyq jáne shejirelik astamshylyqqa, sondai-aq qatygezdik pen zorlyq-zombylyqqa úgitteýge jol berilmeidi. Mundai áreketter QR Qylmystyq kodeksiniń baptary boiynsha áleýmettik jáne ulttyq alaýyzdyqty qozdyrǵany úshin, sondai-aq bilikti kúshpen basyp alýǵa nemese bilikti kúshpen ustap turýǵa úgittegeni jáne jariia túrde shaqyrǵany úshin qylmystyq jaýapkershilikke ákep soǵady», - dep habarlady Bolat Dembaev.
Aita keteiik, Ortalyq sailaý komissiiasy 5 maýsymda ótetin respýblikalyq referendým komissiialarynyń qyzmeti týraly qaýly qabyldady.
Úgit jumystary referendým taǵaiyndalǵannan sátte bastalyp, daýys berýdiń aiaqtalýyna bir kún qalǵanda, iaǵni 2022 jyly 4 maýsymda saǵat 00.00-de aiaqtalady.
