Elordada «Jahandaný jáne ulttaný úderisindegi qazaq tiliniń ómirsheńdigi» respýblikalyq til forýmy ótip jatyr, dep habarlaidy QazAqparat tilshisi.
Til forýmyna elimizdiń barlyq óńirinen 250-den astam ókil, QR Parlamentiniń depýtattary, memlekettik organ, ulttyq kompaniia basshylary, ziialy qaýym ókilderi jáne bilim, ǵylym, biznes, BAQ, sondai-aq basqa da sala mamandary qatysýda.
Mádeniet jáne sport ministri Aqtoty Raiymqulova qazaq tili álipbiin latyn grafikasyna 2025 jylǵa deiin kezeń-kezeńmen kóshirý jónindegi is-sharalar josparynyń aiasynda tiisti jumystar atqarylyp jatqanyn atap ótti.
«Ásirese, tilimizdiń qoǵamdaǵy qyzmetin arttyryp, onyń áleýetin kóterý isi bizdiń jiti nazarymyzda. Jańa álipbige kóshý – jahandaný jáne ulttaný úderisindegi qazaq tiliniń ómirsheńdigin arttyratyn reforma. Osy reformany júzege asyrý barysynda mindetterdi aiqyndaý jáne atqarylǵan jumys nátijelerin nasihattaý – rýhani ári saiasi mańyzdy faktorlardyń biri. Álipbi reformasynyń jalpyhalyqtyq sipat alý tektikterin iske qosý – búgingi kúnniń ózekti máselesi. Onyń joldaryn anyqtaý, Qazaqstandaǵy jáne álemdik tildik qaýymdastyqtaǵy qazaq tiliniń róli men mártebesi týraly zamanaýi bilim, aqparat, nasihat alańdarynyń jumysyn uiymdastyrý - búgingi forýmnyń mindeti», - dedi Mádeniet jáne sport ministri.
Óz kezeginde «Til-Qazyna» ulttyq ǵylymi-praktikalyq ortalyǵynyń bas direktory Álibek Asqar jaqynda Memleket basshysy Qasym-Jomart Toqaev Mádeniet jáne sport ministri Aqtoty Raiymqulovaǵa jańa álipbidi jetildirý jóninde tapsyrma bergenin eske saldy.
«Bul baǵytta ǵalymdarmen birlesip, tiianaqty jumysty ary qarai jalǵastyratyn bolamyz», - dedi ortalyqtyń bas direktory.
Sonymen qatar, Álibek Asqar myrza óńirlerdegi til basqarmalarynyń jumysyna qatysty óziniń pikirin aitty.
«Qazaqtyń kósegesin bir kógertse, osylar kógertedi-aý dep óńirlerdegi til basqarmalaryna úmit artýshy edik. Optimizatsiia degen bále shyqsa boldy, óńir basshylary eń aldymen til basqarmalaryna shúiligedi eken, iaǵni aldymen til basqarmasyn qysqartýǵa umtylady. Qazir 9 oblys pen respýblikalyq dárejedegi qalalarda ondai basqarma atymen joq. Atap aitqanda, basqa bólimdermen aralasyp ketken nemese múldem quryǵan. Eshqandai quqyǵy da joq, aitar sózi ótpeidi», - dedi ol.
Osy oraida ol til tóńireginde qalyptasqan mundai jaǵdai ziialy qaýymdy ǵana emes, barsha jurtshylyqty alańdatatynyn atap ótti.
Aita keteiik, forýmnyń sektsiia jumystary «Ǵylym, bilim jáne til», «Biznes jáne til», «Zań jáne til», «BAQ jáne til», «Memlekettik til bolashaǵy – jastar bolashaǵy», «Óńirlerdegi tildik ahýaldy taldaý» taqyryptaryn qamtydy.
