Mádeniet jáne óner uiymdary qyzmetkerleri jalaqysynyń ósýi shyǵarmashylyq-óndiristik qyzmettiń sapasyn arttyrdy.
Bul týraly QR Prezidenti janyndaǵy Adam quqyqtary jónindegi komissiia otyrysynda Mádeniet jáne sport ministri Aqtoty Raiymqulova aitty, dep habarlaidy QazAqparat.
«Memleket basshysynyń Joldaýyn iske asyrý aiasynda 2020 jylǵy 1 qańtardan bastap mádeniet jáne óner uiymdary qyzmetkerleriniń jalaqysy respýblikalyq deńgeide 50 paiyzǵa deiin, óńirlerde 35 paiyzǵa deiin artty. Jalpy, 34 myńǵa jýyq adamnyń jalaqysy ósti. Onyń ishinde respýblikalyq deńgeide - 3 myńǵa jýyq adam, óńirlerde - 31 myńnan astam. Bul is-shara qyzmetkerlerdiń shyǵarmashylyq-óndiristik qyzmetiniń sapasy men tiimdiligin arttyrýǵa áser etti, ujymdaǵy áleýmettik-psihologiialyq jaǵdaidyń jaqsarýyna, sondai-aq rýhani ónim shyǵaratyn qyzmetkerlerdiń shyǵarmashylyq áleýetiniń jandanýyna múmkindik berdi», - dedi ministr.
Onyń aitýynsha, otandyq balet tarihynda alǵash ret mádeniet uiymynda balet ártisi laýazymynda kásibi qyzmetin toqtatqan kezde keminde 20 jyl kásibi eńbek ótili bolsa, onda sońǵy 3 jyldaǵy ortasha jalaqynyń 60 paiyz mólsherinde arnaiy ai saiynǵy aqshalai tólem engizildi. Erekshe mártebesi bar mádeniet jáne óner salasyndaǵy joǵary oqý oryndarynyń professor-oqytýshyq quramynyń laýazymdyq jalaqysyna 1,75 koeffitsienti saqtaldy.
«2020 jylǵy 1 qańtardan bastap mádeniet jáne sport salasyndaǵy mamandandyrylǵan mektepter men kolledjder qyzmetkerleriniń jalaqysy artty. Ol 2023 jylǵa deiin jyl saiyn 25 paiyzǵa ósetin bolady», - dedi Aqtoty Raiymqulova.
Ministrdiń dereginshe, Qazaqstanda ádebiet jáne óner qairatkerlerine, talantty jastarǵa memlekettik qoldaýdy kúsheitý maqsatynda QR Tuńǵysh Prezidenti – Elbasynyń mádeniet salasyndaǵy stipendiiasy jylyna 240-tan 660 ailyq eseptik kórsetkishke deiin ulǵaityldy. 2020 jyly 75 mádeniet jáne óner qairatkeri memlekettik stipendiia laýreattary atandy. Memleket basshysy 2020 jyly Abai atyndaǵy Ádebiet pen óner salasyndaǵy Qazaqstan Respýblikasynyń Memlekettik syilyǵyn 7 ádebiet jáne óner qairatkerine berdi. Sonymen qatar 2020 jyly alǵash ret memlekettik áleýmettik tapsyrys aiasynda shyǵarmashylyq odaqtardy qoldaýǵa 138,5 mln teńge bólindi.
