Mádeniet jáne sport ministri Aqtoty Raiymqulova álemge áigili kinorejisser Timýr Bekmambetovtiń Ózbekstannyń Týrizm elshisi bolýyna qatysty pikir bildirdi, dep habarlaidy QazAqparat.
Ortalyq kommýnikatsiialar qyzmetinde ótip jatqan brifingide Mádeniet jáne sport ministrine Timýr Bekmambetovti el týrizmin nasihattaýǵa nege tartylmaǵany týraly saýal qoiyldy.
«Kórshimiz Ózbekstannyń ony Týrizm elshisi retinde áriptestikke tartýyn qýana qabyldadyq. Timýr Bekmambetov ǵalamdyq tulǵa ekenin bilesizder. Onyń jobalary álemniń túrli elderinde iske asyp jatyr. Onyń ishinde bizdiń elde de jobalary qarastyrylǵan bolatyn. Týrizm elshilerine qatysty aitsam, búginde Qazaqstannyń týrizm elshisi bolyp júrgen tanymal tulǵalar barshylyq. Dimash Qudaibergen men Samal Esliamova da bar. Árine, Timýr Bekmambetovti de qarastyrǵan bolatynbyz. Biraq pandemiiaǵa bailanysty jáne basqa da sebeptermen onyń elimizge keletin múmkindigi bolǵan joq», - dedi Aqtoty Raiymqulova.
Ministrdiń málimeti boiynsha, keleshekte elimizde Timýr Bekmambetov atsalysatyn kinojobalar iske asýy múmkin.
«Timýr Bekmambetovpen birge josparlanǵan kinemotagrafiialyq jobalarymyz bar. Onyń tarapynan óz daiyndaǵan stsenariilerin iske asyrý boiynsha usynys bar. Onyń bizdiń eldiń de Týrizm elshisi bolýyn qarastyramyz. Biz ol otandasymyzdy maqtan tutamyz. Týrizm elshisin taǵaiyndaýdyń qatyp qalǵan reglamenti joq. Bir eldiń atynan ǵana sala elshisi bolý kerek degen talap qoiylmaidy. Sondyqtan bul baǵytta jumys isteimiz. Ókinishke qarai, pandemiia kóptegen jobalardy, sonyń ishinde Timýr Bekmambetovtiń qatysýymen ótetin josparlardyń merzimin shegerýimizge májbúr bolyp otyrmyz», - dedi Aqtoty Raiymqulova.
