Elimizdiń Mádeniet jáne sport ministri Aqtoty Raiymqulova otandyq talantty ártisterdiń eńbegi men jetistikteri týraly aitty, dep habarlaidy QazAqparat.
«Biz talantty jastarymyzdyń tek «Slavian bazary» baiqaýynda ǵana emes basqa saiystardan jeńispen kelip jatqany týraly maqtanyshpen aitamyz. Árine, bul baiqaýdyń orny bólek. Jalpy óner baiqaýlary birneshe sanatqa bólinedi. Sonyń ishinde «Slavian bazary» úzdik halyqaralyq baiqaýlardyń biri bolyp sanalady. Jýyrda ǵana bizdiń jas dombyrashylar Ulybritaniiadan jeńispen oraldy. Sonymen qatar klassikalyq janrda án aitatyn ánshilerimiz de elimizge túrli baiqaýlardan jeńis ákelip júr. Osy oraida esime túsip otyr, klassikalyq án oryndaý boiynsha tórealqalar men Italiianyń opera ánshileri opera janrynda án aitýdy Qazaqstanda úirený kerek degentuǵyn. Olar bizdiń ártisterdiń ónerine tańqalystaryn jasyrmady», - dedi A. Raiymqulova ZOOM arqyly ótken baspasóz máslihatynda.
Sondai-aq, ministr otandyq jas ónerpazdardyń túrli halyqaralyq jobalarǵa qatysyp, elimizde jeńis ákeletini asa qýantatynyn aitty.
«Jeńiske jetýde memlekettik qoldaý men pedagogtardyń tynymsyz eńbeginiń arqasy. Árine Imanbek sekildi talantyn ózdiginen moiyndatyp jatqan ónerpazdardyń baryn joqqa shyǵarmaimyz. Biz jas talanttarǵa qoldaý kórsetýge árdaiym ázirmiz», - deidi ol.
Aita keteiik, buǵan deiin QR Mádeniet jáne sport ministri Aqtoty Raiymqulova qazaqstandyq jas ánshi, «Slavian bazary» halyqaralyq baiqaýynyń Gran-pri iegeri atanǵan Rýhiia Baidúkendi jeńisimen quttyqtaǵan bolatyn.
