QR Mádeniet jáne sport ministri Aqtoty Raiymqulova elimizdegi lotereia operatorynyń qyzmeti týraly túsinik berdi, dep habarlaidy QazAqparat.
Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine lotereialar jáne lotereia qyzmeti máseleleri boiynsha ózgerister men tolyqtyrýlar engizý týraly» zań jobasy qaraldy.
«Zań jobasy lotereialyq qyzmetti quqyqtyq retteýdi jetildirýge baǵyttalǵan. Sizderge belgili, «Lotereialar jáne lotereia qyzmeti týraly» Zań 2016 jylǵy 9 sáýirde qabyldanǵan bolatyn jáne búgingi ýaqytta zańnama deńgeiinde óz sheshimin qajet etetin, biraz máseleler anyqtaldy. 2017 jylǵy № 48 Úkimet qaýlysymen «Sátti Juldyz» Aktsionerlik qoǵamy lotereia operatory bolyp 15 jyl merzimge anyqtaldy. Lotereia operatory qyzmetkerleriniń sany 748 adamdy quraidy. Respýblika boiynsha 3 myńǵa jýyq taratýshy (agentter) shaǵyn jáne orta kásipkerlerden turady. Olarmen kelisimsharttar negizinde jumys júrgiziledi, iaǵni lotereia operatory lotereianyń durys júrgizilýine jáne taratylýyna tikelei ózi jaýap beredi. Sondai-aq lotereia biletterin taratýdy óziniń negizgi qyzmetterimen qatar atqaratyn iri distribiýterler bar. Mysaly, «Qazpochta» Aktsionerlik qoǵamy jáne iri sýpermarketter jelisi», - dedi ministr.
Taratýshylar (agentter) lotereia operatorynan jalpy taratylǵan lotereia biletteriniń qunynan 6 paiyzdan joǵary syiaqy alady. «Sátti Juldyz» Aktsionerlik qoǵamy 24 jedel (onyń ishinde 18-i elektrondyq) jáne 8 tirajdy lotereia oiynyn (onyń ishinde 4-i elektrondyq) júzege asyrady.
«Sátti Juldyz» Aktsionerlik qoǵamy 2017-2019 jyldar aralyǵynda lotereia biletterin satýdan túsken jalpy ainalymy 18,5 mlrd teńgeni qurady: 2017 jyly – 195,6 mln teńge, 2018 jyly – 1,9 mlrd teńge, 2019 jyly – 16,4 mlrd teńge. Lotereia operatorynyń jalpy ainalymynyń 70 paiyzy lotereia qatysýshylaryna tólenedi, qalǵan 30 paiyzy qosymsha qun salyǵyna (12%), agentterdiń syiaqysyna (6%), lotereia biletterin shyǵarý jáne marketing shyǵyndaryna (5,7%), ákimshilik shyǵystaryna (4,1%) jáne sportty damytýǵa arnalǵan tólemderge (2,2%) jumsalady», - dedi A. Raiymqulova.
Lotereia operatorymen 2,7 mlrd teńge kóleminde salyq, 421,7 mln teńge sportty damytýǵa arnalǵan tólemder jáne 12,1 mlrd. teńge utystar ýaqytyly tólendi.
