QR Mádeniet jáne sport ministri Aqtoty Raiymqulova «Tomiris» filminiń qazaqsha nusqasynyń keshigip shyǵýyna bailanysty pikir bildirdi, dep habarlaidy "Ult aqparat".
Ortalyq kommýnikatsiialar qyzmetinde ótken brifingten keiin QR Mádeniet jáne sport ministri Aqtoty Raiymqulova «Tomiris» filminiń qazaqsha nusqasyna qatysty pikir bildirdi.
«Negizinde filmniń eki nusqasy daiyndalǵan. Negizgi nusqasy qazaq tilinde bolatyn. Ol nusqa film premerasynan keiin bir apta ótken soń shyqty. Shynymen uiat boldy. Aldaǵy ýaqytta mundai jaǵdai qaitalanbaidy dep úmittenemin. Titrlar men sýbtitrlerde qateler bolǵan. Bul kórermenge kórsetý múmkin emes qarapaiym qateler edi», - dedi ministr.
Ol osy úshin jaýapty adamdar ákimshilik tártipte jaýapqa tartylǵanyn aitty.
«Árine, bul filmniń premerasy ne sebepti qazaq tilinde bolmaǵany týraly suraqty sheship bere almaidy. Bul qatelik bólim jumysshylarynyń qateliginen bolǵan», - deidi Aqtoty Raiymqulova.
Eske salsaq, áleýmettik jeli qoldanýshylary týyndynyń tek qana orys tilinde júrip jatqanyn aityp, qazaq kinosynyń qazaq tilinde kórsetilmeýine narazylyq bildirgen edi.
Rejisser filmniń qazaq tilinde dybystalǵan nusqasy bar ekenin, titrlerdi latyn álipbiinde jazǵanda grammatikalyq qateler ketkenin túsindirdi.
