«Atameken» ulttyq kásipkerler palatasy Tóralqasynyń tóraǵasy. Raiymbek Batalov agrarlyq sýbsidiialar tóńiregindegi jemqorlyq daýlary týraly pikir bildirdi, dep habarlaidy QazAqparat.
Palatanyń aqparat alańynda ótken tikelei efirde Raiymbek Batalov Ýkraina men resei arasyndaǵy jaǵdai kásipkerlerge qandai táýekel týyndatyp jatqanyn aitty.
«Osy aidyń aldaǵy aptasynda strategiiany jariialaimyz. Valiýta baǵamyna bailanysty, tasymal boiynsha qiyndyqqa tap bolyp jatqandar bar. Kóp kásipkerlerdiń tasymal tizbegi buzylyp jatady. Taýar óndirisine qajet quramdas bólik nemese shikizat jetpei qalsa, taýar jetkizý tizbegi úziledi. Saldarynan taýarsyz qalýǵa bolady nemese óndiris ýaqytsha toqtap qalady.
Importtyq mindettemeler boiynsha táýekelder bar. Biz qoldaýdyń ótemdik sharalaryn qatar pysyqtap jatyrmyz. Biraq bul ońai emes, óitkeni biýdjettiń de túbi bar», - dedi palata basshysy.
Sondai-aq, ol fermerlerden egis naýqanyna qatysty saýaldar kóp túsip jatqanyn aitty.
«Kúiip turǵan máseleler bar. Palatanyń ustanymy mynadai: sýbsidiialaý tártibin byltyrǵydai qaldyrý kerek dep otyrmyz. Biyl sharttar men somalardy ózgertpeimiz. Sonymen qatar, biz egis naýqanyna qoldaýdyń kólemin ulǵaitýdy suraimyz. Búgingi tańda munai baǵasy barreline 100 dollardan joǵary. Metaldardyń baǵasy da qymbat. Sondyqtan fermerler men taýar óndirýshilerdi qoldaý úshin sýbsidiiany qysqartý durys bolmaidy dep esepteimiz.
900-den astam qylmystyq is qozǵalǵany túsinikti (aýyl sharýashylyǵyndaǵy sýbsidiialaý boiynsha –red.). Biraq bul jerde másele sharýalarǵa emes, sýbsidiialardy ákimshilendirý isine, Aýyl sharýashylyǵy ministrligine qatysty. Sharýalardyń qatysy joq. Qazir naýryz aiy. Bolary bolyp, boiaýy sińgen soń máseleni sheshý taǵy durys emes dep esepteimiz. Kóbi sýbsidiiany biylǵy jyldyń biýdjetine salyp qoidy. Byltyrdan beri tiisti sýbsidiiasyn almaǵandar bar. Osy isti jyldamdatý kerek dep jatyrmyz. Onyń óz protsedýrasy bar ekeni túsinikti. Biraq ony da jyldamdatý qajet», - dedi Raiymbek Batalov.
