Almaty oblysy Raiymbek aýdany Narynqol aýylynda jas mamandarǵa 109 turǵyn úi salynýda. Sonyń ishinde 20 jalgerlik úi salynyp bitip, paidalanýǵa berilgen. Al 89-y biylǵy jyly salynady. Osy atqarylǵan jumystardyń sapasymen oblys ákimi Amandyq Batalov aýdanǵa jasaǵan sapary barysynda tanysty.
Aýdan turǵyndary Memleket basshysynyń sarabdal sheshimimen shekaralyq aimaqqa erekshe kóńil bólinip, Narynqol jańa aýdannyń ortalyǵy bolǵanyna jáne mundaǵy atqarylyp jatqan jumystarǵa degen qýanyshtaryn jasyrmady. Jumys nátijeleri bir jylǵa jýyq ýaqyttyń ishinde kórine bastady. Joldar jóndeldi, jaryqtandyrý júrgizildi, turǵyn úiler salyndy, balalar alańdary men sporttyq alańdar paida boldy, eń bastysy aýdanǵa jastar orala bastady. Elbasynyń Jarlyǵy shyqqannan bergi ýaqytta aýdanǵa 700 adam qonys aýdarǵan. Sondyqtan jas mamandardy baspanamen qamtý eń mańyzdy máseleler qatarynda. 20 jalgerlik úidiń qurylysyna oblystyq biýdjetten 395,3 mln. teńge bólinip, búgingi kúni bul úiler paidalanýǵa berilgen. Osy úilerdi aralap kórip shyqqan oblys ákimi úilerdiń qasbet qabyrǵalarynyń jáne qaqpalarynyń tústerin ózgertýdi eskertti. Jalpy úilerdiń salyný sapasyna kóńili tolatynyn aitty. Eki jas otbasynyń shańyraǵyna kirip, quttyqtaǵan oblys basshysy olarǵa televizor tartý etti.
Amandyq Batalov jergilikti turǵyndarmen áńgimelesý barysynda aýdanǵa jumys saparynyń negizgi maqsaty aýdandy damytý týraly tapsyrmalardyń oryndalý barysymen tanysý jáne keibir isterdiń baiaý júrip jatýynyń sebebin anyqtaý ekenin aitty. Sondyqtan oblys ákimi munan keiingi saparyn aýdan ortalyǵynda qurylysy júrip jatqan, kúrdeli jóndeýden ótkizilip jatqan ákimshilik ǵimarattarda, qurylys nysandarynda jalǵastyrdy.
Aldymen ótken jyldyń jeltoqsanynda paidalanýǵa berilgen turǵyn úimen biriktirilgen ýchaskelik politsiia pýnktine atbasyn burdy. Munda politsiia qyzmetkeriniń jumys isteýine barlyq qolaily jaǵdai jasalǵan. Eske salsaq, jalpy Almaty oblysynda ótken jyly osyndai turǵyn úimen biriktirilgen 167 ÝPP salynǵan bolatyn, bul jumys áli de jalǵasyp keledi. Oblys ákimi jóndeý jasalǵan jergilikti politsiia bólimshesinde de boldy. Qazir munda kadrlar jasaqtaý júrip jatyr. Amandyq Batalov beriletin 89 úidiń ishinen politsiia qyzmetkerlerine de úi berýdi qarastyrý kerektigin atap ótti. Sol siiaqty Narynqol shekara zavstavasynyń da qyzmetimen tanysty.
Óńir basshysy basqa da ákimshilik ǵimarattarynyń qurylys jumystaryn kórdi. Máselen, 1968 jyly salynǵan aýdan ákimdiginiń ǵimaraty jańǵyrtýdan ótkizilýde. Merdiger uiym ókiliniń aitýynsha, barlyq jumystar biylǵy jyldyń mamyr aiynda bitedi.
Prokýratýranyń jańa ǵimaratynyń jobasy oblys ákimi tarapynan maquldanbady. Oblystyq sáýlet jáne qalaqurylysy basqarmasymen birlesip, aýdannyń aýa raiy jaǵdaiyn eskere otyryp jańa joba daiyndap, kórsetýdi tapsyrdy.
Aýdandyq arhiv jáne Azamattarǵa arnalǵan úkimet ǵimarattarynyń jobasy birqatar ózgerister engizilgennen soń maquldandy. Sol siiaqty Amandyq Batalov biylǵy jyly maýsymda qurylysy aiaqtalatyn servistik ákimdik ǵimaratynyń jańǵyrtý jumystaryn da kórdi.
Bir aýysymda 250 adam qabyldaityn emhana qurylysynyń daiyndyq jumystary qarqyndy júrýde. Bul jobany da oblys ákimi jiti qarap shyqty.
Amandyq Batalov aýdan, qala ákimderiniń jańa aýdanǵa kómek kórsetý týraly óz tapsyrmasyn qalai oryndaǵandaryna baǵa berdi. Máselen, Ile, Kóksý, Eskeldi aýdandary kóp qabatty turǵyn úilerdiń shatyrlaryn aýystyryp, jóndep bergen. Keibir úilerde mundai jóndeý jumystary áli de jalǵasýda. Oblys ákimi Raiymbek aýdanynyń ákimi Jolan Omarovqa tiisti organdarmen birlesip, Narynqoldaǵy kóp qabatty turǵyn úilerdi túgel tolyqqandy zerdelep shyǵýdy tapsyrdy. Sondai-aq, olardyń qasbetterin jóndeýdi, shaǵyn qazandyqtar salyp, ortalyqtandyrylǵan jylytý júiesine qosýdy «Óńirlerdi damytý» memlekettik baǵdarlamasy arqyly atqarý tetigin qarastyrý kerektigin aitty. Eger úiler apattyq jaǵdaida bolsa, olardy súrip tastap, bolashaqta ornyna jańa úi salýdy da oilastyrý qajet.
Oblys basshysy balalar oiyn alańdary men sporttyq alańdardyń sapaly, talǵammen salynǵanyn atap ótti. Mysaly, Alakól aýdany jalpy alańy 800 sharshy metr bolatyn, barlyq qajetti infraqurylymy bar balalar oiyn alańyn salǵan. Sol siiaqty Taldyqorǵan, Qapshaǵai qalalary men Panfilov aýdany da osyndai alańdarmen aýdan turǵyndaryn qýantqan.
Raiymbek aýdanynyń mádeniet úiinde aýdan aktivimen kezdesý ótkizilip, foiede eseptik kórme uiymdastyryldy. Aýdan ákimi Jolan Omarov 2018 jylǵy aýdannyń áleýmettik-ekonomikalyq damýy týraly baiandap, 2019 jylǵy irgeli investitsiialyq jobalarǵa toqtaldy. Atap aitqanda, biylǵy jyly «Darhan» sharýa qojalyǵy Saryjaz aýyldyq okrýginde 1 myń basqa arnalǵan mal bordaqylaý alańyn ashady. Jobanyń jalpy quny – 100 mln. teńge, 12 jumys orny qurylady. Sol siiaqty Jambyl aýyldyq okrýginde de 400 basqa arnalǵan, jalpy quny 36 mln. teńge turatyn bordaqylaý alańy paida bolady. «Labasy-A» kooperativi de 12 jumys ornyn qurýdy josparlap otyr.
Aýdanda altyn óndirý jobalary da bar. Máselen, altyndy tájiribelik-óndiristik óndirý men baǵalaý isinde mamandandaǵan «Gold Production» JShS biylǵy jyldyń kóktemine qarai altyn óndire bastaýdy josparlap otyr. Bul jumystar Jambyl aýyldyq okrýginde júzege asyrylady, investitsiia somasy – 8 mlrd. 649 mln. teńge. Jobany júzege asyrý barysynda 2019-2026 jyldary 60-tan 80 adamǵa deiin jumyspen qamtý jospary bar. Taǵy eki kompaniia – «SKN» jáne «Narynqol Gold» JShS-lary da altyn izdeýmen, óndirýmen ainalyspaq. Investitsiianyń jalpy kólemi 3 mlrd. teńgeden asady. Jobalar 2019-2020 jyldary iske asyrylady.
Raiymbek aýdanynyń týrizmin damytý isi de kóńil qýantady. 2019-2020 jyldarǵa arnalǵan jobalardyń ishinde «Retai» ekoaýyly, «Shyńdal-san» eko-týristik jáne halyqaralyq ań aýlaý demalys orny jáne t.b. bar. Munda 200-ge jýyq jumys ornyn qurý, 500 mln. teńgedei investitsiia tartý josparlanǵan.
Kartop ósirý isi de nazardan tys qalǵan joq. Jalpy ótken jyly 5655 ga jerden 113 269 tonna kartop jinalǵan.
Kórmeniń tanystyrylymy aiaqtalǵannan keiin oblys ákimi Amandyq Batalov aýdan aktivimen kezdesý ótkizdi.
- Sizdermen júzdesip, atqarylǵan jumysty jáne aldaǵy jospardy talqylaý úshin arnaiy keldim. Qazir aýdanda infraqurylymdy qalpyna keltirý, ákimshilik ǵimarattardy jáne áleýmettik nysandardy jóndeý men salý jumystary júrgizilip jatyr. Bul isterdi jyldamdatý kerek. Keibir baǵyttarda baiaýlyq baiqalady, qarqyndy azaitýǵa bolmaidy. Prezidenttiń Jarlyǵy shyqqanyna bir jylǵa jýyq ýaqyt boldy, naqty tapsyrmalar berildi, solardyń barlyǵyn sapaly, óz ýaqytynda aiaqtaý kerek. Ózimniń birinshi orynbasaryma aiyna bir ret aýdanǵa shyǵyp, tapsyrmalardyń oryndalý barysyn qadaǵalap turýdy tapsyramyn. Bul rette jańa aýdandaǵy ister jumys barysynda kúndelikti baqylaýda bolýy tiis. Oblystyń aýdan, qalalarynyń ákimderi kómektesti. Mysaly, keibir aýdandar balalar alańdaryn, sporttyq alańdar salyp berdi, keibireýi úilerdiń shatyrlaryn aýystyryp berdi, biraq kásipkerlerdi tarta otyryp, budan da aýqymdy jumystarǵa qol ushyn sozýǵa bolar edi. Tekeli qalasynyń, Aqsý aýdanynyń ákimderine búginge deiin eshqandai kómek kórsetpegenderi úshin eki ese júkteme tapsyramyn. Narynqol damyǵan, kórki kóz tartatyn aýdan ortalyǵyna ainalýy kerek. Sol sebepti de men búgin keibir ǵimarattardyń jobasyn qaita qaraýdy tapsyrdym. Usaq-túiek detaldaryna deiin talǵammen oilastyrylýy kerek. Jumys sapasyna erekshe mán bere otyryp, belgilengen merzimde bitirýge kúsh salynýy tiis, - dedi óz orynbasarlary men oblystyq basqarmalar men departamentter basshylaryna tapsyrma bere otyryp A.Batalov.
Birinshi kezekte ákimshilik ǵimarattar men áleýmettik nysandarǵa qatysty másele sóz boldy. Amandyq Batalov árbir nysannyń – emhana, dene shynyqtyrý-saýyqtyrý kesheni, aýdandyq jáne aýyldyq ákimdikter, TJ, arhiv, prokýratýra ǵimarattary, Azamattarǵa arnalǵan úkimet jáne t.b. nysandardyń paidalanýǵa beriletin merzimin naqty belgilep berdi. Sol siiaqty oblys ákimi jastarmen kezdesýinde aitylǵandai, árbir aýdan ortalyǵy men qalalarda jastarǵa qyzmet kórsetý ortalyǵy salyný tiistigin eske saldy:
- Taldyqorǵanda mundai ortalyq bar. Bizge taǵy 19 ortalyq salý kerek. Eskizdik jobasyn daiyndańdar, kelisýge usynyńdar. Biylǵy jyldy Elbasy Jastar jyly dep jariialady. Jastardyń jumys isteýine qolaily jaǵdailar qarastyrylǵan Jastarǵa qyzmet kórsetý ortalyqtarynyń qurylysyna qatysty jumystardyń barlyǵyn biylǵy jyly bitirýimiz kerek, - dedi A. Batalov.
Aýdandy odan ári damytý josparlaryn talqylai otyryp, kartop saqtaý qoimalarynyń qurylys júrgizý, áleýmettik jobalarǵa bólinetin grant sanyn ulǵaitý, internet sapasyn jaqsartý týraly usynystardy qoldaitynyn aitty. Sonymen qatar negizgi pýlti aýdandyq politsiia bólimshelerine kelip toǵysatyn beinebaqylaý júiesimen qamtý, aýdandy tabiǵi gazǵa qosý jumysyn oilastyrý máselelerin de tapsyrdy.
Jiyn qorytyndysynda "Jalpy aýdanda jumys jaqsy júrip jatyr. Áli de atqarylatyn is kóp. Memleket qoldaýynyń arqasynda bizdiń múmkinshilikterimiz mol, barlyq qajetti kómekti kórsetemiz. Qolǵa alynyp jatqan jobalardyń sapasy birinshi kezekte talap etiletin bolady", - dedi A. Batalov.
