Almaty oblysy Raiymbek aýdanynda kartoptyń gollandiialyq jańa sorty alqabynyń kólemi byltyrǵy jylǵa qaraǵanda 2019 jyly on esege ulǵaitylyp, biyl 700 gektarǵa sebilgen. Odan túsetin ónim ár gektarynan 380 tsentnerge jetedi dep josparlanyp otyr. Bul týraly jýyrda oblys ákimi Amandyq Batalovtyń Raiymbek aýdanyna barǵan saparynda belgili boldy, dep habarlaidy "Ult aqparat" óńir basshysynyń baspasóz qyzmetine silteme jasap.
Raiymbek aýdanynda oblys ákimi A. Batalov birneshe nysandy aralady. Atbasyn burǵan alǵashqy nysan - Tekes aýylyndaǵy servistik daiyndaý ortalyǵy. Ótken jyly oblys biýdjetinen kartop óndirisin damytý úshin arnaiy SDO quryp, tehnikalar alýǵa 500 mln. teńge bólingen bolatyn. Sol kómektiń arqasynda 3 SDO jasaqtalyp, 458 mln. teńgege jalpy sany 87 birlik tehnika satyp alynǵan, sonyń ishinde 21 traktor, 5 kombain bar. Qalǵan somaǵa aldaǵy ýaqytta tehnikalar taǵy da tolyqtyrylatyn bolady. SDO-nyń temir tulparlaryn tizgendeýge jas mamandar Almatydan arnaiy shaqyrylǵan. Olardyń arasynda týǵan jerden jyraqqa ketken narynqoldyq jastar da bar.
Raiymbek aýdandyq aýyl sharýashylyǵy bóliminiń basshysy Nurlan Oralqulovtyń aitýynsha, biyl aýdanda kartop 6 myń gektarǵa sebilip, odan 123 myń tonna ónim alý josparlanyp otyr. 2018 jyly oblystyq ákimdik kómegimen 240 tonna gollandiialyq «Sante» jáne «Agriia» sorttary satyp alynǵan, sol sorttardyń tuqymdary byltyr 70 gektarǵa sebilse, biyl bul kórsetkish 10 esege ósip, 700 gektarǵa jetkizildi. Jańa tuqymnyń, jańa tehnologiianyń arqasynda ónimdilik te artty. Buryn ár gektarynan 170-180 tsentnerden kartop alynatyn bolsa, qazir bul kórsetkish 380 tsentnerge jetken.
Alqap basynda «Órken» jáne «Miras» sharýa qojalyqtarynda ósirilgen kartoptyń túrli sorttarynyń ónimderi kórsetildi. «Órken» ShQ basshysy Talǵat Núsipqojaevtyń sózine súiensek, «Sante» sortyn óńdeýge chipsy shyǵaratyn kásiporynmen kelissózder júrgizilýde. Sonymen birge osy aýdanda kartopty óńdep, krahmal daiyndaityn zaýyt ashýǵa usynys túskeni jáne ony júzege asyrýdyń múmkindikteri qarastyrylyp jatqany aitylyp, sharýalar oblys basshylyǵynan osy bastamaǵa qoldaý tanytýdy surady. Oblys ákimi Amandyq Batalov igi bastamaǵa tiisti kómek kórsetýge ázir ekenin jetkizip, osyǵan qatysty naqty joba-josparlaryn birge talqylaýǵa shaqyrdy. «Shikizatty mol ári sapaly óndiretin aimaqty óńdeýshiler ózderi izdep keledi, bul - naryqtyń, biznestiń zańdylyǵy. Mundai bastamalardy qashanda qoldaýymyz kerek», - dedi ol óz sózinde.
Munan soń oblys basshysy Narynqol aýylynda qurylysy júrip jatqan birqatar mekemeler ǵimarattaryn aralap kórdi. Mundaǵy sporttyq-saýyqtyrý kesheniniń qurylysyn «FýdMS» JShS júrgizýde. Quny 1,1 mlrd. teńgege jýyq ǵimarat 4 myń sharshy metrdi quraidy. Qurylys alańynda jumys qyzý júrip jatyr. Sol siiaqty 83 jeke turǵyn úi túsetin oryndy kórip, onyń jobasymen tanysty. Oǵan qosa respýblikalyq baǵynystaǵy memlekettik mekemeler ornalasatyn ǵimarat, «Azamattarǵa arnalǵan úkimet», servistik ákimdik, aýdandyq ákimdik ǵimarattarynyń qurylysyn aralaǵan oblys basshysy jumystyń sapasyna nazar aýdardy. Ǵimarattar aýlalaryna tóseletin tastar men plitkalardyń, ornatylatyn qorshaýlardyń úlgileri kórsetilip, abattandyrý josparlary tanystyryldy. Oblys ákimi merdiger uiymdarǵa jumys kestesinen keshikpeýdi, oǵan qosa qurylysty sapaly júrgizýdi, ǵimarattardyń belgilengen merziminde iske qosýǵa daiyn bolýy kerektigin qatań eskertti. Máselen, «Azamattarǵa arnalǵan úkimet» ǵimaratynyń qurylysyn merdiger mekeme «Kerýen Servis» JShS ókili qarasha aiynda aiaqtaityndaryn aitsa, qaita jańǵyrtylyp jatqan aýdandyq ákimdik ǵimaratynyń ishki árleý jumystary ǵana qalǵan.
Oblys ákimi A. Batalov jańa qurylǵan aýdannyń áleýmettik-ekonomikalyq damýyndaǵy eleýli ózgerister týraly jáne aldaǵy mindetter jaiynda aityp ótti.
- Jańa aýdandaǵy jumys qarqyndy. Halyqqa qyzmet kórsetetin túrli mekemeler salynyp, bar ǵimarattardy qaita jańǵyrtyp, jańalap jatyrmyz. Narynqol aýylyn kógaldandyrýǵa, joldardy jóndeýge, kósheni jaryqtandyrýǵa, balalardyń oiyn alańdary men sporttyq alańdaryn salýǵa, turǵyn úilerdiń aýlalaryn kórkeitýge, qai jaǵynan bolsyn aýdan azamattary, oblystyń árbir aýdan, qalasy óz úlesterin qosýda. Narynqol óńiriniń, ásirese, aýyl sharýashylyǵyndaǵy múmkindigi kóp. Raiymbek aýdanyna kartopty óndiristik masshtabta ósirýge jasaǵan memleket qoldaýy óz nátijesin berip otyr. Jas mamandar týǵan jerge oralýda. Tehnikalar jańardy, tolyqty. Degenmen tehnikany kútip-baptaýdy – jabyq shatyrdyń astynda ustaý, mailaý, kóktemgi-kúzgi naýqanǵa daiyndaý sharalaryn júrgizýdi umytpaý kerek. Sonda ǵana tehnika uzaq jyl senimmen qyzmet etedi. Oblys boiynsha irrigatsiialyq júielerdi qalpyna keltirý jumysyna kiristik. Sonyń nátijesinde bir ǵana Raiymbek aýdanynyń ózinde 6 myń gektar jer qalpyna keltiriledi. Iaǵni kartop óndirisin odan ári damytýǵa múmkindik molaiady degen sóz. Biz óz tarapymyzdan aýyldyń eńbekker halqyna qoldaý kórsetip, aýyl sharýashylyǵyn órkendetýdi jalǵastyratyn bolamyz, - dedi A. Batalov.
