Pandemiianyń talaptaryna tez beiimdelip, jańa kontent, jańa tehnologiia múmkindikterin qosyp, aýditoriia úshin kúresýge májbúrmiz. Astana Media Week - 2020 sharasynyń «Mýltiplatformalylyq» taqyrybyndaǵy plenarlyq sessiiasynda «Bilim Media Group» kompaniiasynyń direktory Raýan Kenjehanuly osylai aitty, dep habarlaidy QazAqparat.
Kompaniia basshysynyń aitýynsha, mundai kúres tez ózgerýdi talap etedi. «Kishkentai ǵana mysal: ózderińiz jaqsy biletindei karantin sharalaryna bailanysty biylǵy jyldyń naýryz –sáýir ailarynan bastap álem boiynsha 1,6 mlrd oqýshy qashyqtan oqytý formatyna kóshti. Bizdiń elde de solai boldy. Buǵan Qazaqstan da, sol sekildi basqa da memleketter daiyn bolǵan joq. Óitkeni mundai kólemde qashyqtan oqytýǵa daiyn birde-bir platforma, birde-bir kompaniia da, memleket te bolǵan emes», - dedi Raýan Kenjehanuly.
«Bilim Media Group» kompaniiasynyń direktorynyń aitýynsha, buǵan deiin bilim berý salasyndaǵy aqparattandyrý quraldary, platformalary jasalyp jatqanymen olar mektep muǵalimderine kómekshi qural retinde ǵana bolǵan.
«Osyndai jaǵdaida shuǵyl daiyndyq jasap, múlde bólek tehnologiialyq quraldardy igerip, jańa kontent jasaý arqyly buǵan deiin meńgerilmegen deńgeilerge shyǵýǵa múmkindik aldyq. Sebebi biz qurastyryp jatqan platformalarǵa kún saiyn 1,5 mln adam kirip otyr. Mundai trafigi bar Qazaqstanda júie joq deýge bolady. Qazaqstandyq internet trafikti ólsheýshiler men zertteýshilerdiń bergen málimeti boiynsha 30 jyldyq tarihymyzǵa mundai trafik bolǵan emes», - dedi ol.
Raýan Kenjehanuly óz sózinde mundai trafik bir jaǵynan úlken múmkindik bolǵanymen, ekinshi jaǵynan óte úlken talap ekenin de eske saldy.
«Biz tez beiimdele alýymyz kerek. Biz veb-saittyń mobildi nusqasyn shuǵyl damytýǵa májbúr boldyq. Sebebi 1,5 million adamnyń 80 paiyzy mobildi telefondar arqyly kiredi. Qazir balalardyń da, muǵalimderdiń de qolynda smartfon bar. Odan bólek ózimizge ǵana táýeldi bolmai, YouTube sekildi platformalardyń múmkindigin keńinen paidalaný úshin biz biraz kontentti sonda salyp, onyń da múmkindigin kóreiik degen tájiribelerdi engizdik. Bul da óte qyzyq boldy, sebebi qazaq tilindegi sabaqtardy kórsetetin YouTube-arnaǵa 7 kúnniń ishinde 100 myń adam jazylyp, turaqty túrde kóre bastady», - dedi Raýan Kenjehanuly.
Aita ketsek, eloradada Astana Media Week 2020 sharasy ótkizilýde. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Media aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jinap keledi jáne ózekti taqyryptar talqylanady.
