«Ulttyq aýdarma biýrosy» qoǵamdyq qorynyń atqarýshy direktory Raýan Kenjehanuly «Jańa gýmanitarlyq bilim. Qazaq tilindegi 100 jańa oqýlyq» jobasy aiasyndaǵy oqýlyqtarǵa qatysty pikir bildirdi, dep habarlaidy QazAqparat.
«2017 jyly Elbasynyń bastamasymen «Rýhani jańǵyrý» atty aýqymdy keshendi baǵdarlama qolǵa alyndy. Onyń negizgi baǵyttarynyń biri «Jańa gýmanitarlyq bilim. Qazaq tilindegi 100 jańa oqýlyq» dep atalady. Ol jobanyń maqsaty – dúniejúzindegi eń tanymal, ataqty ári bedeldi oqý oryndarynda qoldanylatyn álemdik avtorlardyń oqýlyqtaryn qazaq tiline aýdaryp, bizdiń oqý oryndaryna jetkizý. 2017 jyldan beri 2020 jyldyń aiaǵyna deiin 100 oqýlyq tolyqtai aýdarylyp, árqaisysy 10 myń danamen basylyp, elimizdegi barsha joǵary oqý oryndary kitaphanalaryna jetti», - dedi Kenjehanuly Ortalyq kommýnikatsiialar qyzmetinde.
Onyń aitýynsha, oqýlyq iriktegen kezde qazaqstandaǵy JOO-lardyń usynystary eskerildi. Jalpy sany 800-den astam usynys kelip túsken.
«Ulttyq komissiiasynyń janyndaǵy jumys toby osy oqýlyqtardy qarap, saraptap, aýdarylýy tiis oqýlyqtardyń kriteriilerin shyǵardy. Sol talaptardyń negizinde oqylyqtar irikteldi. 100 oqýlyqty 1 jylda aýdarý múmkin emes ekeni túsinikti. Alǵashqy jyly 17 oqýlyq, odan keiin – 30, sodan keiingi jyly taǵy 30 oqýlyq, sońynda qalǵan 23 oqýlyq aýdarylyp, joba máresine jetti», - dedi atqarýshy direktor.
Onyń sózine qaraǵanda, «Ulttyq aýdarma biýrosy» qoǵamdyq qorynyń úilestirýimen osy jumysty atqarýǵa jalpy sany 300-den asa maman qatysty. Aýdarma sapasyn qamtamasyz etý úshin jumysqa tájiribeli aýdarmashylar men joǵary oqý oryndarynyń ustazdary, ǵylymi redaktsiia jasaýǵa elimizdiń belgili ǵalymdary, ádebi redaktsiiaǵa tanymal qalamgerler, bilikti redaktorlar men eń tájiribeli baspagerler tartyldy.
«Ulttyq aýdarma biýrosy» álemniń eń bedeldi, ári tanymal ǵylymi ortalyqtarymen bailanys ornatty. Dúniejúziniń aldyńǵy qatarly oqý oryndarynyń baǵdarlamalary zerttelip, qoldanystaǵy eń jaqsy degen oqýlyqtarǵa qol jetkizý úshin Garvard, Kembridj jáne Oksford ýniversitetteriniń baspalary, «Sengage», «Pearson», «McMillan», «Penguin» jáne basqa da iri halyqaralyq baspa úilerimen seriktestik ornatyldy.
«Joba aiasynda aýdarylǵan oqýlyqtardy qysqasha tanystyryp ótsek, birinshi kezekte batys pen shyǵystyń intellektýaldyq tarihyn birdei qamtyǵan filosofiia toptamasyn ataý qajet. Munda ataqty Bertran Rasseldiń «Batys filosofiiasynyń tarihy», Entoni Kennidiń 4 tomdyq jinaǵy, Sokrattan Deridaǵa deiingi filosofiianyń qysqasha tarihy, Islam filosofiiasy men klassikalyq arab oishyldarynyń antologiiasy, Japon, Úndi jáne Qytai filosofiiasy tolyq qamtyldy. Áleýmettaný jáne psihologiia toptamasynda Rittserdiń «Áleýmettaný teoriiasy», Maierstiń «Áleýmettik psihologiia» oqýlyǵyn, Eliot Aronsonnyń «Kópke umtylǵan jalǵyz» atty eńbegin, Shýltstyń «Qazirgi psihologiia tarihy» aýdaryldy. «Halyq sany jáne qoǵam: demografiiaǵa kirispe», «Internet psihologiiasy» oqýlyqtary buryn bizde bolmaǵan jańa pánderge negiz qalady», - dedi Raýan Kenjehanuly.
Til bilimi jáne ádebiettaný baǵytynda aýdarylǵan oqýlyqtar qatarynda Stiven Pinkerdiń «Til – instinkt», Viktoriia Fromkinniń «Til bilimine kirispesin» jáne Maikl Raiannyń 5 tomdyq «Ádebiet teoriiasy» atty jinaǵy bar.
Budan bólek, Ekonomika, menedjment jáne kásipkerlik toptamasynda mikro jáne makroekonomika, Gregori Menkiýdiń «Ekonomiksi», Filip Kotlerdiń «Marketing printsipteri», «Startegiialyq menedjment», «Uiymdyq minez-qulyq», «HR menedjment» pen «CRM: tutynýshymen qarym-qatynas menedjmenti», «Kásipkerlik», «Jeke qarajat», «Memlekettik qarjy», «Kóshbasshylyq teoriiasy men praktikasy», «Halyqaralyq biznes», «Nátijeli kelissóz: alǵysharty men amaldary» jáne osy baǵyttaǵy basqa da birqatar oqýlyqtar qazaq tilinde alǵash ret shyqty. Sonyń arqasynda qazaqstandyq biznes-mektepter tuńǵysh qazaq tilindegi MBA baǵdarlamasyn ashýǵa múmkindik aldy.
Tarih, antropologiia jáne dintaný baǵytynda MakGroHil baspasy daiyndaǵan adamzat tarihyn tolyq qamtyǵan, eki tomdyq «Panorama: dúniejúzi tarihy», «Tarihi bilim páni men zertteý ádisteri», «Antropologiia tarihy men teoriiasy», Entoni Smittiń «Ulttyń etnostyq tamyry» atty zertteýi, sondai-aq, Keron Armstrongtyń álemge áigili (History of God) degen eńbegi qazaqsha «Qudaitaný baiany» degen atpen alǵash ret shyqty.
«Aýdarylǵan 100 oqýlyq aiasyndaǵy ǵylymi terminder men uǵymdar negizinde 4 jańa sózdik qurastyryldy. Olar: «Áleýmetti ǵylymdar sózdigi», «Ekonomika sózdigi», «Qazaq tiliniń kirme sózder sózdigi» jáne Oksford ýniversiteti baspasymen birge daiyndalǵan, «Oxford Qazaq Dictioanry» ataýymen shyǵatyn 500 myń sóz ben sóz tirkesin qamtityn úlken «Aǵylshyn-qazaq jáne qazaq-aǵylshyn Oksford sózdigi». Bizdiń oiymyzsha, osynyń barlyǵy - bizdiń bilim men ǵylym úshin, qoǵam úshin óte úlken olja», - dedi ol.
Budan buryn habarlanǵandai, QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komissiianyń keńeitilgen májilisi aiasynda gýmanitarlyq bilim salasynda qazaq tilindegi 100 oqýlyq tanystyryldy.
