Saiasattanýshy Rasýl Jumaly Qazaqstanda sailaý turaqtylyqqa, qaýipsizdikke nuqsan keltirilmei, laiyqty deńgeide ótkenin málim etti, dep habarlaidy QazAqparat.
«Bul sailaý tolyǵymen minsiz ótti dep aita almaityn shyǵarmyz. Jalpy sailaý ataýlynyń ózi barlyq elde, onyń ishinde órkenietti ári damyǵan elderdiń tájiribesin qaraityn bolsaq, eshqaisysy minsiz bolmaidy. Biraq úrdis, protses retinde bul – bizdiń el úshin óte mańyzdy qadam boldy. Alysqa barmai-aq túrli elderdegi 2020 jylǵy sailaý tájiribesin qaraityn bolsaq, synaqtan kóptegen memlekettiń súrinip, qulap jatatynyn kórip otyrmyz. Áli kúnge deiin basylmai jatqan Belarýstegi oqiǵalar, Qyrǵyz Respýblikasyndaǵy úshinshi revoliýtsiia, Armeniiadaǵy jaǵdai, AQSh-tyń ózindegi tyǵyryqqa ushyraǵanyn kórip otyrmyz», - dedi Rasýl Jumaly elordada ótken «SAILAU-2021: Parlament sailaýynyń aldyn ala qorytyndylary» atty saraptamalyq talqylaýda.
Saiasattanýshy osy rette Qazaqstanda eń aldymen turaqtylyqqa, qaýipsizdikke nuqsan keltirilmei, sailaý ájeptáýir laiyqty deńgeide ótkenin aityp ótti.
«Bul óte mańyzdy. Ekinshiden, eldegi jańa jaǵdaida, saiasi ahýalda ótkizilip otyrǵanyn atap ótý kerek. Prezident bastaǵan reformalar iske asyrylyp jatyr. Sonyń nátijesinde birtalai zańǵa ózgerister engizildi. Osy sailaýdyń jańashyldyǵy – jańa sailaý zańnamasyna sáikes ótkizilip otyrǵany. Onyń ishinde 30 paiyzdyq kvotany atap óter edim. Tiisinshe Májilistiń de, máslihattyń ájeptáýir jasarýy menińshe, óte mańyzdy», - dedi ol.
Rasýl Jumaly Parlament sailaýynyń ýaqytynda ótkizilgenin jaǵymdy qubylys ekenin jetkizdi.
