Caiasattyń basy – Til. Onsyz ult joq, demek ulttyq rýh joq, olai bolsa memlekettiń ózi joq. Qazaq tili memlekettik mártebege ie bolǵaly 27 jyldan asty. Sóz júzinde. Is júzinde orys tiliniń tasasynda qalyp keledi.
Bilik jumysy men otyrystarynyń 95 paiyzy oryssha júrgiziledi, memlekettik mekemelerge qazaqsha bilmei jumysqa turý op-ońai, orys tilinsiz múmkin emes. Qoǵamdyq oryndar – halyqqa qyzmet ortalyqtary, bankter, dúkender, kinoteatrlar, qoǵamdyq kólik - 95 paiyzy oryssha. Kóshelerdegi habarlamalardy qarańyz, 95 paiyzy qaita oryssha. Teledidardy qossańyz da, radiony tyńdasańyz da sol jaǵdai - 95 paiyzy orys tilinde de, qalǵany aralas. Ras, basqa da ulystardy kemsitpeý kerek degen sóz jii aitylady.
Biraq, birinshiden, qazaq tili tek qazaqtyń ǵana emes, sol ulystar turatyn memlekettiń tili. Ekinshiden, soraqysy sol, atalǵan qoǵamdyq oryndarda júrgenniń 95 paiyzy qazaq. Osyndai bassyzdyq pen namyssyzdyqqa kim jaýap beredi? Óz memleketiniń tilin qurmettemegen laýazym ielerinen ne igilik kútýge bolady? Bógde eldiń múddesin óz halqynan joǵary qoiǵandar nelikten joǵary mansaptarda otyrý kerek?
Alaida kiná ózimizden de bar. Qazaq tilin ózimiz nege dáriptemeimiz? Til zańynyń oryndalýyn nege talap etip, sotqa bermeimiz? Basqalar bylai tursyn, ózara nege Ana tilimizde sóilesip jazyspaimyz? Óz attarymyzda –ov, -in, -ich syqyldy otarlyq jalǵaýlardan qashan arylamyz? Reseidiń gýberniiasy emes, bul Ór de Azat Qazaqtyń eli ekenin nege kórsetpeimiz?
