Tanymal saiasattanýshy Rasýl Jumaly aldaǵy Parlament Májilisi jáne máslihat sailaýyna qatysty pikir bildirdi, dep habarlaidy QazAqparat.
Aita keteiik, búgin elordada Eýraziialyq integratsiia institýtynyń uiymdastyrýymen «Sailaý-2021: saiasi modernizatsiianyń jańa kezeńi» atty sarapshylyq kezdesý ótti.
Is-sharanyń maqsaty – Parlament Májilisine sailaýdyń erekshelikteri men rólin saraptamalyq turǵyda talqylaý, saiasi partiialardyń strategiialaryn taldaý, el azamattarynyń saiasi mádenietin arttyrý boiynsha ustanymdar men usynystardy ázirleý.
«Qazir bárimiz qyzyqty da mańyzdy kezeńniń aldynda turmyz. Sailaýǵa bir aidan az ýaqyt qaldy. Bul sailaýdyń birtalai jańashyldyǵy bar. Eski dástúrlerdiń de saqtalýyn, onyń ishinde keleńsiz tájiribelerdiń qaitalanýyn baiqap otyrmyz. Jańashyldyqqa kelsek, sailaý kóp jyldan keiin óziniń zańmen belgilengen kezeńinde ótip otyr. Menińshe, bul - igi ári jaqsy jańalyq. Buǵan deiin prezidenttik bolsyn, parlamenttik bolsyn sailaýlardyń barlyǵy túrli sebeptermen kezekten tys ótetin. Birese daǵdarysty jeleý etip, birese aýqymdy jobalardy alǵa tarta otyryp sailaýdyń merzimi ózgeretin. Menińshe, bul faktor – órkeniettiliktiń, memlekettiń, biliktiń óz zańdaryn qurmettei bilýiniń kórsetkishi», - dedi Rasýl Jumaly.
Saiasattanýshy Ulttyq keńes aiasynda birtalai saiasi modernizatsiiaǵa bet túzegen zańdar qabyldanyp, ózgerister engizilgenin aityp ótti.
«Parlamenttiń oppozitsiia uǵymynyń engizilip otyrǵany, sol oppozitsiianyń qýyrshaq emes naqty bolýy – bizdiń elimizge aýadai qajet. Qazir saiasi alańdaǵy partiialar qanshalyqty búkil qoǵamnyń múddesin, narazylyǵyn bildirip otyr? Bul taqyrypta pikirtalas qurýǵa bolady. Meniń oiymsha, jaqyn arada jańa bir saiasi oiynshylardyń, toptardyń paida bolýy óte mańyzdy. Bilik organdary oǵan barynsha múmkindik jasaýy kerek», - dedi saiasattanýshy.
