13 qarasha keshkisin Groznyi qalasynyń áýejaiyna 40 jolaýshysy bar - Siriianyń qaqtyǵys bolyp jatqan aimaǵynan qutqarylǵan 12 áiel men 29 bala mingen arnaiy reispen jetken ushaq qondy. Olardyń arasynda bes adam qazaqstandyq, ekeýi - Ózbekstan, al qalǵany reseilikter - Sheshenstan, Ingýshetiia, Daǵystan men Bashqurtstannan, - dep habarlaidy RIA Novovsti.
Taiaý Shyǵys pen Soltústik Afrika elderindegi Sheshenstan basshysynyń ókiletti tulǵasy Ziial Sabsabi bul adamdardy Siriianyń túrli qalasynan jinap ákelgenin aitady.
Bul Siriiadan jetkizilgen ekinshi jáne adam sany kóp top boldy. Munyń aldynda 21 qazanda Siriianyń Hmeimima qalasynan 22 adam: jeti áiel men 14 bala jetkizilgen bolatyn. Sheshenstan úkimetiniń saityndaǵy aqparat boiynsha, respýblika basshylyǵynyń arqasynda tamyz aiynan Taiaý Shyǵystan 90 adamdy qaitarý múmkin bolǵan.
Ramzan Qadyrovtyń ózi Instagram jelisindegi paraqshasy arqyly qutqarylǵan áielder men balalar "iblis lańkesteriniń qataryn toltyrǵan" ákeleri men kúieýleriniń "qylmystyq essizdiginen" qaqtyǵys júrip jatqan jerlerde qalyp qalǵan dep málimdedi. Sonymen qatar, ol mundai qutqarý jumystary asa qaýipti jaǵdaida júretinin, alaida, Resei azamattaryn qiyn jaǵdaida tastamaitynyn aitty.
Óz kezeginde, QR Syrtqy ister ministrligi qazaqstandyqtardy Siriiadan evakýatsiialaǵan úshin Sheshenstan basshylyǵyna alǵys bildirdi.
"Sheshenstan astanasy - Groznyiǵa Sirianyń qaqtyǵys bolyp jatqan aimaqtarynan bir top adam jetkizilgeni belgili. Olardyń arasynda Qazaqstan azamattary da bar. Olar Oral qalasynyń 1988 jylǵy turǵyny (áiel adam) men onyń kámeletke tolmaǵan tórt balasy. Groznyi áýejaiynda olardy Reseide Qazaqstan elshiliginiń qyzmetkerleri qarsy aldy. Jaqyn arada olar Qazaqstanǵa jetkiziledi. Biz Resei taraby men Sheshenstan Respýblikasynyń basshylyǵyna shynaiy rizalyǵymyzdy bildiremiz", - deidi QR SIM baspasóz qyzmetinii jetekshisi Ánýar Jainaqov.
