Sheshenstan prezidenti Ramzan Qadyrov Baiqońyrdaǵy qazaqstandyq 7 jasar Elif Nurjanovaǵa ota jasatý úshin 10 500 dollar aýdardy. Bul týraly kaz.tengrinews.kz tilshisine qyzdyń anasy Ainur Nurjanova habarlady.
Ainur Nurjanovanyń aitýynsha, Qadyrovtyń ózi Instagram jelisindegi pomogite_elif paraqshasyna jazyp, kómek berýge ýáde bergen. Al keiinnen aqsha aýdarǵan.
"Bul naǵyz baqyt, meniń sózim joq. Qurmetti @kadyrov_95 sizge kóp raqmet, ana retinde alǵys aitamyn. Qýanyshtan kózime jas alyp otyrmyn. Qurmetti dostar, osy kúnge deiin esepshotqa kóp qarajat aýdaryldy. Árqaisysyńyzǵa raqmet aitamyn. Meiramnan soń naqty qansha soma túskenin aitamyn. 1 qazanda tekseristen ótemiz. Álhamdýlillah, bizdiń esepshot jabyldy", - dep jazdy Ainur óziniń paraqshasynda.
Aita keteiik, qyzdyń anasy qarajatty áleýmettik jeliler arqyly jinaǵan. 9 qyrkúiekte Túrkiiada qyzdyń omyrtqasyna ota jasaldy. Dárigerler onyń ishki organdaryna qysym túspes úshin baryn jasady.
