- Raqymshylyq aiasynda bas bostandyǵynan aiyrý oryndarynan 1800 adam bosap shyǵady.
Búgin Parlament Májilisinde «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týral» zań jobasy boiynsha jumys toby otyrysynyń aldynda tilshilerge suhbat bergen QR Bas prokýrorynyń birinshi orynbasary Iogan Merkel osylai málimdedi, dep habarlaidy QazAqparat.
«Qazir tergeý aiasynda qamalǵandardy qosa eseptegende 36 myńy otyrǵyzyldy. Resmi túrde biz 62-inshi (sottalǵandardyń sany boiynsha) oryndamyz, al resmi emes esepteitin bolsaq, álemde 64-orynda turmyz», - dedi Merkel.
Onyń sózine qaraǵanda, bas bostandyǵynan aiyrý oryndaryndaǵy 36 myń adamnyń ishinde raqymshylyqqa1800-i iligýi múmkin.
«Bular áleýmettik turǵyda qaýip týdyrmaityndar. Aldaǵy jyly barsha Qazaqstan halqy EKSPO-ny ótkizedi, Almatyda da sharalar uiymdastyrylady jáne biz osynyń barlyǵyn eskerýimiz kerek. Al eger asa aýyr qylmys jasaǵandardy bosatsaq, bizge eshkim de kelmeidi, iaǵni bul qaýipsizdikke áser etedi», - dedi I. Merkel.
Jalpy, raqymshylyqqa tergeý júrip jatqandar, sot qaraýyndaǵylar, sondai- aq, probatsiiadaǵylardy qosa eseptegende 30 myńǵa tarta adam iligýi yqtimal.
Bul rette aiyppul sharasyna, shartty jazaǵa kesilgender, qoǵamdyq jumystarǵa jáne basqa da aýyr emes jazaǵa tartylǵandar qamtylatyn bolady.
Belgili bolǵandai, lańkestik jáne basqa aýyr qylmys jasaǵandar raqymshylyqqa ilikpeidi. Negizi raqymshylyq jasaý asa aýyr emes qylmystarǵa, jasóspirimderge, júkti áielderge jáne qoǵamdyq qaýiptiligi joq qylmystarǵa kózdelgen.
Budan buryn habarlanǵandai, osy aptada Parlament Májilisiniń jalpy otyrysynda «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týraly» QR Zańynyń jobasy jumysqa alyndy.
Eske sala keteiik, Memleket basshysy Nursultan Nazarbaev Konstitýtsiianyń 61-babynyń 1-tarmaǵyna sáikes óz bastamasymen Parlament Májilisiniń qaraýyna «Qazaqstan Respýblikasy Táýelsizdiginiń 25 jyldyǵyna bailanysty raqymshylyq jasaý týraly» zań jobasyn engizdi. Bul raqymshylyq sharasy zań buzǵan azamattarǵa qatysty izgilik aktisi, memleket tarapynan meiirimdilik pen senim bildirýdiń kórinisi bolyp sanalady.
«Osy jyly Qazaqstan Táýelsizdiginiń 25 jyldyq mereitoiyn atap ótýde. Respýblika Konstitýtsiiasy adam jáne adamnyń ómiri, quqyqtary men bostandyqtaryn eń qymbat qazyna dep jariialaidy. Gýmanizm qaǵidatynyń bir kórinisi oǵan sáikes raqymshylyq jasaý aktin qoldanatyn zańdy qabyldaý bolyp tabylady. Zań jobasyna sáikes, azamattardyń áleýmettik álsiz toptary, sonyń ishinde kámeletke tolmaǵandar, júkti áielder, kámeletke tolmaǵan nemese múgedek balalary bar áielder, múgedekter, qart adamdar, sondai-aq aýyr emes qylmystyq quqyq buzýshylyqtar jasaǵandar qylmystyq jazadan bosatylady»,-dedi jalpy otyrysta Zańnama jáne sot-quqyqtyq reforma komitetiniń tóraǵasy Nurlan Ábdirov.
