Qańtar oqiǵasy boiynsha 5 kúdiktige qatysty qylmystyq qýdalaý toqtatyldy. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qilymjanov aitty, dep habarlaidy QazAqparat.
«Aldyn ala málimetterge sáikes, raqymshylyq sharasymen shamamen 1,5 myńǵa jýyq adam qamtylmaq. Bas prokýratýra jergilikti prokýrorlarǵa «Raqymshylyq jasaý» Zańy normalarynyń birkelki qoldanylýyn jáne qatań zańdylyqty saqtaýdy qamtamasyz etý týraly tapsyrma berildi», - dedi Qilymjanov Ortalyq kommýnikatsiialar qyzmetinde.
Onyń aitýynsha, qazirgi kezde jazany oryndaityn organdar 878 sottalǵanǵa qatysty sottarǵa qamaý merzimin qysqartý jáne jazadan bosatý týraly usynystar joldady.
«Tergeý organdary sotqa deiingi tergep-tekserý barysynda orta dárejeli qylmysty jasaǵan 5 kúdiktige qatysty qylmystyq qýdalaýdy toqtatty. Qalǵandary aýyr jáne asa aýyr qylmystardy jasaǵan, olarǵa raqymshylyq sot tártibimen qoldanylatyn bolady», - dedi Bas prokýratýra ókili.
Osy oraida olarǵa qatysty berilgen jazalardyń merzimi qaita qaralmaq.
Budan buryn habarlanǵandai, biyl 2 qarashada Memleket basshysy «Raqymshylyq jasaý týraly» Qazaqstan Respýblikasynyń Zańyna qol qoidy.
