Respýblikadaǵy jalpy salyqtyq jáne basqa da aýyrtpalyqty 34%-dan 20-25%-ǵa deiin azaitý kerek. Bul biýdjet kiristerin arttyrady. Mundai pikirdi prezident janyndaǵy ulttyq qoǵamdyq senim keńesiniń múshesi Rahym Oshaqbaev aitty, dep habarlaidy Baq.kz agenttigi.
«Joldaýda aitylǵan taǵy bir mańyzdy bastama – bul salyqtar men tólemderdiń barlyq biýdjettik qorlarǵa biryńǵai tólemge biriktirilýi. Bul turǵyda konsensýs bar. Múmkin kezeń-kezeńimen júrgizýge bolady. Birinshiden, tólemdi biriktirý, ekinshiden, bazalyq aýdarymdardy biryńǵai júige keltirý kerek. Úshinshiden, Grýziianyń modelin qarastyryp kórgen durys bolar dep oilaimyn. Iaǵni, Grýziianyń tájiribesi boiynsha salyqtyq júktemeni 34%-dan 20-25%-ǵa deiin azaitýǵa bolady. Bizdiń aldyn ala esebimiz boiynsha, eger salyqtyq jeńildik bolsa, kerisinshe biýdjettiń kirisi artady. Bul degenimiz Laffer qisyǵynyń boiymen ońtaily deńgeige aýysady", - deidi Oshaqbaev 6 qyrkúiekte ótken Qazaqstan Respýblikasy prezidentiniń janyndaǵy Ulttyq senim ulttyq keńesiniń alǵashqy otyrysynda.
Aita keteiik, ulttyq qoǵamdyq senim keńesi QR prezidenti janyndaǵy konsýltativtik-keńesshi organ sanalady. Ulttyq keńes qyzmetiniń negizgi maqsaty - jurtshylyqtyń, saiasi partiialardyń, azamattyq qoǵamnyń ókilderimen keńinen talqylaý negizinde memlekettik saiasattyń ózekti máseleleri boiynsha usynystar men usynymdar. Ol óz qyzmetinde Qazaqstan Respýblikasynyń konstitýtsiiasyn, zańdaryn, Qazaqstan Respýblikasy prezidentiniń aktilerin, ózge de normativtik quqyqtyq aktilerdi, sondai-aq osy erejeni basshylyqqa alady.
Keńes tóraǵasy – Qazaqstan prezidenti Qasym-Jomart Toqaev. Tóraǵa orynbasary – prezident ákimshiliginiń basshysy Qyrymbek Kósherbaev, hatshysy – prezident keńesshisi Erlan Qarin.
