«Talap» qoldanbaly zertteýler ortalyǵynyń direktory Rahym Oshaqbaev nesie beretin aýyl sharýashylyǵy salasyndaǵy uiymdardyń bárin bir qarjy uiymyna biriktirýdi usyndy, dep habarlaidy QazAqparat.
«Karantinnen keiin bizdi ekonomikalyq tyǵyryqtan alyp shyǵatyn salalardyń biri – aýyl sharýashylyǵy. Alaida biýrokratiialyq protsedýralarǵa bailanysty qarjylandyrýǵa qatysty sheshimder kesheýildep qaldy. Bul baǵytta jumysty barynsha jedeldetý kerek», - dedi Rahym Oshaqbaev «Atameken» Ulttyq kásipkerler palatasynyń feisbýk-paraqshasynda onlain rejimde sóilegen sózinde.
Sarapshynyń aitýynsha aýyl sharýashylyǵyn qarjylandyrý turǵysynda bank júiesine ǵana iek artý múmkin emes ekenin jetkizdi.
«Bank bárine, ásirese shaǵyn jáne usaq biznes ókilderine ýaqytynda aqshany jetkize almaidy. Sol sebepti bul rette múlde jańa amal-ádis kerek. Qazirgi daǵdarystyń teńdessiz sipaty bar. Tipti bálkim, qazir elde Agrobank ashýǵa deiingi qadamdarǵa barǵan jón bolar. Nesie beretin aýyl sharýashylyǵy salasyndaǵy uiymdardyń bárin bir qarjy uiymyna biriktirip, sol arqyly kásipkerlerdi tómen paiyzdyq nesiemen qoldaǵan jón. Kepildik qaldyrý tártibinen ketip, naqty biznes-josparlarǵa qarajat aýdarý kerek», - dedi ol.
Rahym Oshaqbaev bul turǵyda Qytaidyń tájiribesin mysalǵa keltirdi. Onyń aitýynsha ondaǵy fermerlerge berilýi tiis qarajat qoljetimdi bolǵan.
«Ol jaqta óte tómen paiyzben, kepilsiz ártúrli salany, onyń ishinde aýyl sharýashylyǵyn nesiemen qoldaǵan memlekettik bankter boldy. Meniń oiymsha bizge de dál qazir osy tájiribe kerek», - dep túidi ol.
Eske sala ketsek QR Prezidenti Qasym-Jomart Toqaev tótenshe jaǵdai rejimin biylǵy 11 mamyrǵa deiin uzartý jóninde sheshim qabyldady. Bul týraly Memleket basshysy búgingi málimdemesinde aitqan bolatyn.
