Qazaqstan meditsina ýniversitetiniń Epidemiologiia, dáleldi meditsina jáne biostatistika kafedrasynyń dotsenti Rafail Qypshaqbaev tabiǵi immýnitetke senim artyp, balasyn vaktsinalaýdan tartynyp otyrǵan ata-analarǵa úndeý tastady, dep habarlaidy QazAqparat.
«Qarańǵylyqpen kúresý qiyn ári berekesiz sharýa. Árine, vaktsinatsiia máselesinde árkimniń eriktilik quqyǵy bar. Men árdaiym kez kelgen naýqannyń erikti júrgenin jaqtaimyn. Qandai da bir sharaǵa májbúrleý keri reaktsiia týǵyzady. Bul jaǵdaida ata-analarǵa vaktsinalaýdyń paidaly ekenin, munyń igilik ekenin keńinen túsindirip,aýqymdy aqparattyq jumys júrgizý qajet», - dedi Rafail Qypshaqbaev Densaýlyq saqtaý ministri uiymdastyrǵan onlain dáriste.
Onyń pikirinshe, antivakser atalyp ketken toptyń qoǵamdyq pikirge áseri kúshti. Óitkeni TikTok, Instagram siiaqty zamanaýi bailanys quraldaryn utymdy paidalanady.
«Qazir halyqtyń kóbi aqparatty resmi kózderden, kásibi aqparat quraldarynan emes, áleýmettik jeliden izdeidi. Sondyqtan resmi túsindirmelerdi qabyldaýy qiyn. Óitkeni qazirgi adamdardyń nazary 30-40 sekýndtyq málimetten artyq dúniege aýa bermeidi. «Antivakserlerdiń» sózi kópshilik úshin tartymdy ári túsinikti bolǵandyqtan, resmi meditsina aqparat maidanynda utylyp jatyr dep aitýǵa bolady», - dedi ǵalym.
Sondai-aq, ol tabiǵi immýnitetke senim artyp, balasyn vaktsinalaýdan tartynyp otyrǵan ata-analarǵa úndeý tastady.
«Statistikaǵa súiensek, balalardyń shamamen 85%-y koronavirýs infektsiiasyn simptomsyz ótkeredi. Biraq qalǵan 15%-ynda aýrý asqynǵan formada júrý yqtimaldyǵy joǵary. Simptomsyz aýyrǵan balalar ainalasyndaǵylarǵa juqtyrýy múmkin. Ásirese virýs aldynda qaýqarsyz egde jastaǵy adamdarǵa juqtyrsa, saldary qiyn bolýy múmkin», - dedi maman.
