79 jasqa qaraǵan shaǵynda kórnekti aqyn, jazýshy, Qazaqstan Jazýshylar odaǵynyń múshesi, Qazaqstannyń eńbek sińirgen qairatkeri, «Parasat» ordeniniń iegeri, Sheshenstan Memlekettik syilyǵynyń laýreaty Rafael Niiazbekov dúnieden ozdy. Bul týraly QR Jazýshylar Odaǵy málimdedi.
Rafael Niiazbekov 1943 jyly 24 naýryzda Jambyl oblysy, Talas aýdanynyń qazirgi Tamabek aýylynda dúniege kelgen.
1978 jyly Qazaq Ulttyq ýniversitetiniń filologiia fakýltetin támamdaǵan. Qazaq radiosynyń ádebiet redaktsiiasynda, «Juldyz» jýrnalynda, «Jazýshy» baspasynda qyzmet atqarǵan.
Onyń ár jyldary «Keler kúnder», «Qarataý men Alataý», «Jalyn keshken», «Jer janary», «Órken», «Temirqazyq», «Biiktei ber, taýlarym!», «Báiterekter jel ótinde turady», «Tyńda meni, zamana!», «Sheshender», «Tamuq otyna janbaǵan», «Júregimde – ǵasyrlardyń salmaǵy», «Mahambet maidany», «Aibozym meniń», «Kúrkirep ótken kúnderim», «Qulagerdiń qulyny», «Armysyń, arý dúnie!», «Biz osyndai elmiz» (túrik tilinde) syndy kóptegen jyr jinaqtary, «Qyzyl úi», «Tas qudai», «Taýqymet» romandary jáne «Otaǵasy», «Qyzǵysh qus», «Qańtar», «Hoziain ochaga» (orys tilinde) povesteri, shyǵarmalar jinaǵynyń 9 tomdyǵy jaryq kórgen. D.A.Qonaev týraly óleń-roman jazǵan.
Shyǵarmalary orys, ýkrain, sheshen, túrik tilderine aýdarylǵan.
M.Rýmiantsevanyń, A.Chepýrovtyń, Q.Qulievtyń, D.Kýgiltinovtyń, K.Týiorskiidiń jáne basqa da aqyndardyń óleńderin tárjimalaǵan.
Ol Halyqaralyq «Alash» ádebi syilyǵynyń, «Eren eńbegi úshin» jáne Resei Jazýshylar odaǵynyń Sergei Esenin altyn medaldarynyń, D.Qonaev ordeniniń iegeri. D.A.Qonaev atyndaǵy ýniversitettiń Qurmetti professory. «Sheshender» jinaǵy úshin avtorǵa Sheshen Respýblikasynyń eń joǵary Memlekettik «Ult namysy» ordeni berilip, Memlekettik syilyǵy qosa tapsyrylǵan.
Qazaq rýhaniiatynda óshpes iz, ólmes mura qaldyrǵan qalamgerdiń jarqyn beinesi máńgi jadymyzda saqtalady.
