Áleýmettik jelide belgili qoǵam qairatkeri, kásipker Muhtar Jákishevtiń qyzynyń uzatý toiyna qatysty pikirtalas órshidi. Talqylaýǵa sebep bolǵan jait – qalyńdyqtyń betashar rásiminiń óz úiinde ótkizilýi, dep habarlaidy ult.kz.
Jeli qoldanýshysy Erbol Mándibek bul jaǵdaiǵa qatysty pikir bildirip, qazaq dástúrinde betashar rásimi kelin túsken jerde jasalýy tiis ekenin atap ótti. Onyń aitýynsha, qyzdyń óz úiinde betashar ótkizýi qalyptasqan saltqa sáikes kelmeidi.
«Uzatylǵan qyzdyń beti barǵan jerinde ashylady emes pe? Qyzdyń óz úiinde, óz elinde betin ashqany nes?» degen pikirin jariialaǵan ol mundai qadam dástúrden aýytqý bolýy múmkin ekenin jazdy.
Sondai-aq jazba avtory kúieý jigittiń sheteldik, naqtyraq aitqanda Afrika qurlyǵynan ekenin meńzep, eki eldiń salt-dástúrindegi aiyrmashylyqtarǵa nazar aýdarǵan. Ol qazaq qoǵamynda qalyptasqan jón-joralǵylardyń saqtalýy mańyzdy ekenin aityp, máseleni ázil men syn aralas sarynda kóterdi.
"Dástúrdi buzǵany úshin Jákishevter áýletine shtraf salý kerek. Erteń eldiń bári osylarǵa eliktep óz qyzynyń betin óz úiinde ashyp jatsa qaitemiz? Qazaqtyń betashar deitin eń qundy dástúrin qorǵaýymyz qajet. Mynaý isteri súiekke tańba. Afrikalyq qudalarda dym uiat joq eken. Qyzymyzdy tegin alyp otyr eshe óz elderine shaqyryp bir quman sý quia almaǵandary qalai?", - dep jazdy pikir iesi.
Al jeli qoldanýshylarynyń pikiri ekige jaryldy. Biri dástúrdiń negizgi máni saqtalsa, rásimniń qai jerde ótkeni mańyzdy emes dep sanasa, endi biri betashardyń ǵasyrlar boiy qalyptasqan tártibi buzylmaýy kerek degen kózqarasty ustandy.
Ázirge Muhtar Jákishevtiń otbasy bul pikirtalasqa qatysty resmi túsinikteme bergen joq. Degenmen áleýmettik jelidegi talqylaý qazaqtyń salt-dástúrlerin zamanaýi jaǵdaida qalai saqtaý kerek degen máseleni qaitadan kún tártibine shyǵardy.
