Avtokólik satyp alǵanda kópshilik qozǵaltqyshtyń qýatyna, syrtqy kelbetine nemese baǵasyna nazar aýdarady. Alaida tájiribeli avtosarapshylar eskeretin taǵy bir mańyzdy faktor bar – kóliktiń ótimdiligi. Iaǵni, ony keiin qaita satý qanshalyqty ońai bolady?
Qazaqstannyń qaitalama avtonaryǵynda keibir modelder tehnikalyq jaǵynan jaman bolmasa da, satyp alýshylar arasynda suranysqa ie emes. Mundai kólikter ýaqyt ótken saiyn baǵasyn tez joǵaltyp, uzaq ýaqyt satylmai turýy múmkin. Eske sala keteiik, buǵan deiin elimizdegi eń ótimdi kólikter týraly da jazǵan bolatynbyz.
Avtonaryq mamandary ótimdiligi tómen avtomobilderdi satyp almas buryn olardyń artyqshylyqtary men kemshilikterin muqiiat saralaýǵa keńes beredi.
Qytai kólikteri baǵasyn tez joǵaltyp jatyr
Sarapshynyń aitýynsha, qazirgi tańda eń kóp qunsyzdanyp jatqan segmentterdiń biri – Qytaida shyǵarylǵan avtomobilder.
Ásirese Chery Tiggo 4 Pro, Tiggo 2 Pro jáne birqatar basqa modelder burynǵy baǵasymen salystyrǵanda birneshe million teńgege arzandaǵan. Buryn 7–9 million teńgege satylǵan kólikterdiń keibiri búginde 5–6 million teńgege de satyp alýshy taba almai júr.
Mamannyń pikirinshe, mundai jaǵdaidyń birneshe sebebi bar:
ekinshi naryqtaǵy usynystyń kóbeiýi;
satyp alýshylardyń seniminiń tolyq qalyptaspaýy;
qosalqy bólshekterge qatysty kúmán;
bolashaqtaǵy baǵasynyń belgisizdigi.
Sonymen birge barlyq qytailyq modelder birdei emes. Mysaly, Changan CS55 nemese JAC J7 sekildi kólikterdiń jaǵdaiy salystyrmaly túrde jaqsyraq bolǵanymen, olardy da tez ári tiimdi baǵamen ótkizý ońai emes.
Jaqsy kólik bolǵanymen, suranysy tómen modelder bar
Naryqtaǵy ótimdilik árdaiym kóliktiń sapasyn bildirmeidi.
Mysaly, Lexus IS F Sport júrgizý qasietteri jaǵynan óte jaqsy baǵalanǵanymen, oǵan kóbine tek osy modeldi arnaiy izdeitin adamdar ǵana qyzyǵýshylyq tanytady.
Osyndai jaǵdai Volvo kólikterine de tán.
Sarapshy bul markanyń qaýipsizdigi joǵary, jabdyqtalýy bai ekenin aitqanymen, Qazaqstanda oǵan degen suranys tómen ekenin atap ótti. Ásirese Qytaida qurastyrylǵan Volvo modelderi satyp alýshylar arasynda asa tanymal emes. Buǵan qosalqy bólshekterdiń azdyǵy men qyzmet kórsetý shyǵyndary áser etedi.
Keibir eýropalyq kólik modelderiniń álsiz tustary
Volkswagen Passat pen Golf modelderi de ótimdiligi tómen kólikter qataryna engizilgen.
Ásirese 2012 jylǵa deiin shyǵarylǵan Passat úlgilerinde qozǵaltqyshtaǵy mai shyǵynynyń kóp bolýy jáne gaz taratý tizbeginiń sozylýy siiaqty aqaýlar jii kezdesedi.
Sonymen qatar Volkswagen markasynyń tehnikalyq qyzmet kórsetýi men qosalqy bólshekteri basqa brendtermen salystyrǵanda qymbatqa túsedi. Bul faktorlar olardyń ekinshi naryqtaǵy suranysyn tómendetedi.
Al Golf-tyń besinshi býyny senimdiligi jaǵynan sátsiz modelderdiń biri retinde baǵalanyp otyr. Sondyqtan satyp alýshylar bul kólikterge saqtyqpen qaraidy.
Qosalqy bólshek máselesi satyp alýshyny shoshytady
Ótimdiligi tómen kólikterdiń taǵy bir úlken máselesi – qosalqy bólshekter.
Chevrolet Captiva, Suzuki, Lifan nemese burynǵy qytailyq brendterdiń keibir modelderine qajetti bólshekterdi ásirese óńirlerden tabý qiyn.
Sarapshynyń aitýynsha, Almaty sekildi iri qalalarda qajetti bólshekter kezdeskenimen, oblystarda jóndeý jumystary áldeqaida kúrdeli bolýy múmkin.
Satyp alýshylardyń basym bóligi dál osy sebepten mundai kólikterden bas tartady.
Eski kólikterge suranys jyldan-jylǵa azaiyp keledi
Avtonaryqtaǵy taǵy bir baiqalǵan úrdis – eski kólikterdiń ótimdiliginiń tómendeýi.
Buryn suranysqa ie bolǵan Mercedes-Benz, Mazda, Subaru, Nissan Primera jáne basqa da kóptegen modeller búginde ailap satylmai turýy múmkin.
Munyń basty sebebi – satyp alýshylardyń nesiege bolsa da jańa avtomobil alýǵa umtylýy.
Qazirgi tańda kópshilik qoljetimdi jańa Chevrolet Cobalt, Hyundai, Kia nemese Qytaidyń jańa modelderin tańdaǵandy jón kóredi. Sondyqtan jasy jiyrma jyldan asqan kólikterdiń naryqtaǵy baǵasy turaqty túrde tómendep keledi.
Sarapshy qandai kólikterdi tańdaýǵa keńes beredi?
Avtomamannyń pikirinshe, avtomobil satyp alǵanda bolashaqtaǵy satylymdy da aldyn ala oilaǵan jón.
Eger kólik uzaq jyl paidalanýǵa alynbasa, ótimdiligi joǵary modelder áldeqaida tiimdi bolady.
Maman eń aldymen naryqta suranysy turaqty brendterge nazar aýdarýǵa keńes beredi. Onyń ishinde:
Toyota;
Hyundai;
Kia;
keń taralǵan ári senimdi modelder.
Al ótimdiligi tómen kólikterdi tek olardy uzaq ýaqyt paidalanýdy josparlaǵan jáne tehnikalyq qyzmet kórsetý shyǵyndaryna daiyn adamdar ǵana qarastyrǵany durys.
Óitkeni mundai avtomobilderdiń negizgi kemshiligi – keiin satý kezinde aitarlyqtai qarjylyq shyǵynǵa ushyraý qaýpi joǵary.
