Mańǵystaý oblysynyń Munaily aýdanynda mektep jasyndaǵy balanyń máiiti tabyldy, dep habarlaidy ult.kz.
Oqiǵa týraly aýdan turǵyndarynyń biri málimdegen. Onyń aitýynsha, balanyń denesinen qylqyndyrý belgileri baiqalǵan.
«Alǵashynda balalardyń biri ony jai ǵana átkenshekte oinap júr dep oilaǵan. Keiin jaqyndap qaraǵanda, balanyń beti kógerip, aýzynan aq kóbik shyǵyp jatqanyn kórgen. Sodan keiin ata-anasyna habar berip, olar politsiia men jedel járdem shaqyrǵan. Oqiǵanyń naqty sebebi ázirge belgisiz», – deidi turǵyn.
Marqumnyń ólimin jedel járdem qyzmeti de rastady. Dárigerler oqiǵa ornyna 1 maýsym kúni shaqyrtýmen baryp, 12 jastaǵy balanyń kóz jumǵanyn anyqtaǵan.
«1 maýsym kúni politsiiaǵa Atameken aýylyndaǵy úilerdiń birinde kámeletke tolmaǵan balanyń qaitys bolǵany týraly habarlama tústi. Aldyn ala málimet boiynsha 12 jastaǵy jasóspirim aýlada qoldan jasalǵan átkenshekte oinap júrip, jazataiym oqiǵa saldarynan ómirine qaýip tóndiretin jaraqat alǵan. Bul derek boiynsha adam ólimine qatysty qylmystyq is qozǵaldy. Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan qajetti tergeý amaldary júrgizilip jatyr, al ózge aqparat tergeý múddesine orai jariia etýge jatpaidy», – dep málimdedi Mańǵystaý oblystyq politsiia departamenti.
