Shilde aiynyń basynda Qyrǵyzstannyń Osh qalasyndaǵy bazarlardyń birinde bolǵan keleńsiz oqiǵa kópshiliktiń nazaryn aýdardy, dep habarlaidy ult.kz.
Qulpynai satyp turǵan qarapaiym fermer men birneshe adamnyń arasynda janjal týyndap, onyń sońy kásipkerdiń soqqyǵa jyǵylýymen aiaqtalǵan. Oqiǵanyń beinejazbasy áleýmettik jelilerde keńinen tarap, jurtshylyqtyń qyzý talqysyna tústi.
Beinejazbany kórgen myńdaǵan adam fermerge qoldaý bildirip, onyń eńbegine qurmetpen qaraitynyn jetkizdi. Kópshilik ádiletsizdikke ushyraǵan azamatqa kómektesý úshin arnaiy onyń saýda ornyna baryp, ónimin satyp ala bastaǵan. Nátijesinde birneshe kúnniń ishinde onyń qulpynaiy túgel satylyp, satyp alýshylar uzyn-sonar kezekke turǵan.
Arada birneshe apta ótken soń fermerdiń ómiri múlde basqa arnaǵa buryldy. Buryn tek jergilikti turǵyndarǵa ǵana tanymal bolǵan kásipker búginde Osh qalasyndaǵy eń kóp izdeletin qulpynai satýshylardyń birine ainaldy. Onyń kúndelikti jumysy áleýmettik jeliler arqyly tikelei kórsetilip, videolary júzdegen myń qaralym jinap keledi.
Fermerdiń áleýmettik jelidegi tanymaldyǵy artqan saiyn túrli kompaniialar men jarnama berýshiler de oǵan qyzyǵýshylyq tanyta bastaǵan. Qazir ol birneshe brendpen yntymaqtastyq ornatyp, jarnamalyq usynystar qabyldap júr. Bul qosymsha tabys oǵan kásibin keńeitýge múmkindik bergen.
Onyń aitýynsha, kútpegen qoldaýdyń arqasynda jańa saýda jabdyqtaryn satyp alyp, ónim kólemin kóbeitken. Sonymen qatar kómekshi jumysshylardy da jumysqa alǵan. Qazir fermer qulpynaimen qatar ózge de baqsha ónimderin satýdy josparlap otyr.
Alaida ol tanymaldyqty tek jeke paidasyna ǵana paidalanbaitynyn aitady. Qazir kásipker muqtaj otbasylarǵa azyq-túlik taratyp, turmysy tómen azamattarǵa tegin jemis-jidek berýdi dástúrge ainaldyrǵan. Sondai-aq aýyldaǵy balalarǵa arnalǵan qaiyrymdylyq sharalaryna qatysyp, áleýmettik jobalardy qoldap keledi.
