Búgin QR Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev halyqqa esep berý kezdesýinde egov.kz portalynan QR-kod arqyly alýǵa bolatyn memlekettik qyzmetterdiń tizimin jariialady, dep habarlaidy QazAqparat.
Ministrdiń aitýynsha, QR-kod arqyly alýǵa bolatyn qyzmetterdi osy aida usyný úshin tehnik mamandar jumys isteýde. QR-kod arqyly alýǵa bolatyn alǵashqy memlekettik qyzmetter: nekeni tirkeý, balanyń týǵanyn tirkeý, balabaqsha kezegine qoiý, zańdy tulǵany tirkeý, salyq esebin qabyldaý (250 forma).
«Bul qyzmetterdi kompiýter arqyly alý barysynda ETsQ-ǵa qol qoiý kezinde QR-kodty skanerlep, qyzmetti eGov mobile qosymshasy arqyly alýǵa suraý jiberýge bolady. Ol úshin kompiýterińizge ETsQ-ny paidalaný úshin qosymsha baǵdarlama ornatýdyń qajeti joq», - dep atap ótti Asqar Jumaǵaliev.
Osylaisha, azamat eGov.kz portalynan qyzmetterdi alý barysynda «QR-code arqyly qol qoiý» fýnktsiiasyn tańdai alady. Sodan soń eGovMobile qosymshasyn paidalanyp, monitorda paida bolǵan kodty skanerleidi.
Osy aidyń sońynda keibir qyzmetterdi QR-kod arqyly alý múmkindigi iske asyrylady. Aldaǵy ýaqytta QR-kodtyń kómegimen alýǵa bolatyn qyzmetterdiń qatary kóbeiedi.
«eGov mobile» qosymshasy App Store jáne PlayMarket platformalarynda bar. Sondai-aq, atalǵan mobildi qosymshada suranysqa kóp ie qyzmetter men servisterdiń 60 túri qoljetimdi. Azamattyń jeke kýáligi sekildi «tsifrlyq qujattary» da engizilgen. Mobildi qosymshany tolyqqandy paidalaný úshin ETsQ-nyń bolýy shart jáne mobildik azamattar bazasynda tirkelýińiz kerek.
