Qostanai oblysynda zańsyz mikrokarjylyq qyzmet uiymdastyryp, qylmystyq jolmen alynǵan kiristerdi zańdastyrǵan jergilikti turǵynǵa qatysty sot úkimi shyqty, dep habarlaidy ult.kz.
Qarjylyq monitoring agenttiginiń málimetinshe, ol zańnamada kózdelgen litsenziiasyz múlikti kepilge qoiyp qaryz berý qyzmetin júrgizgen. Klientterdi OLX pen Instagram jelilerindegi jarnamalar arqyly tartqan.
Tergeý barysynda kúdiktiniń azamattardyń qarjylyq qiyn jaǵdaiyn paidalanyp, jyldyq mólsherlemesi 120%-ǵa deiin jetetin joǵary paiyzben qaryz bergeni anyqtaldy. Sonymen qatar, notariattyq sharttarda qaryzdyń naqty somasynyń ornyna aldyn ala eseptelgen syiaqy, túrli shyǵyndar men ózge tólemder qosylyp, qaryz kólemi negizsiz ulǵaitylǵan.
Máselen, jábirlenýshilerdiń biri qolyna 9 mln teńge alǵanymen, kelisimshartta 14 mln teńge kórsetilgen. Keiin oǵan 18 mln teńge kólemindegi taǵy bir qaryz sharty rásimdelgenimen, bul qarajat is júzinde berilmegen. Sonyń saldarynan sot sheshimimen azamattan jalpy 26 mln teńge óndirilgen.
Agenttik málimetinshe, zańsyz shemaǵa 50-den astam adam tartylyp, kúdiktiniń qylmystyq jolmen tapqan tabysy 1 mlrd teńgeden asqan.
Sot úkimimen ol 2 jyl 8 aiǵa bas bostandyǵynan aiyryldy. Sondai-aq qylmystyq tabysqa satyp alynǵan tórt páter, eki jer ýchaskesi, Mercedes-Benz G500, Dodge RAM 1500 jáne Hyundai Santa Fe avtokólikteri memleket kirisine tárkilendi.
Aita keteiik, sot úkimi ázirge zańdy kúshine engen joq.
