Qostanaida temirjol boiymen júrgen 15 jastaǵy jasóspirim vagonnyń ústine shyǵyp, aýyr jaraqat aldy. Ony kerneýi 27 myń volttan asatyn elektr togy soqqan, dep habarlaidy ult.kz.
Oqiǵa bolǵan kúni jasóspirim dostarymen birge serýendep júrgen.
"Nash Kostanai" portalynyń jazýynsha, balalar úige baratyn joldy qysqartý úshin temirjol boiymen júrgen. Sol jerde poiyzdy kórip, sýretke túspek bolǵan.
Jasóspirimniń aitýynsha, ol vagonnyń tóbesine otyryp, dosy sýretke túsirgen. Keiin ornynan turǵan sátte elektr doǵasy soǵyp, soqqydan shamamen eki metr jerge ushyp túsken.
Toq soqqannan keiin jasóspirim esinen tanyp qalǵan. Esin jiǵan soń úiine óz betimen barmaq bolǵanymen, oqiǵa ornyna jetken meditsina qyzmetkerleri oǵan alǵashqy kómek kórsetken.
Jasóspirim oblystyq balalar aýrýhanasynyń travmatologiia bólimine aýyr jaǵdaida jetkizildi. Onyń denesiniń 60 paiyzdan astamyn kúiik shalǵan.
Travmatolog-ortoped Miras Eljasovtyń aitýynsha, jasóspirim birden jansaqtaý bólimine jatqyzylyp, onda shamamen bir jarym ai em alǵan.
«Baqytymyzǵa orai, onyń qoly men aiaǵyn saqtap qala aldyq», – dedi dáriger.
Maman mundai elektr jaraqatynyń asa qaýipti ekenin atap ótti. Onyń aitýynsha, mundai jaǵdaida aman qalý múmkindigi óte tómen.
Qazir jasóspirim jansaqtaý bóliminen palataǵa aýystyryldy. Alaida ony aýrýhanadan shyǵarýǵa áli erte. Dárigerlerdiń boljamynsha, emdeý sharalary taǵy 2-3 aptaǵa sozylýy múmkin.
