قوستانايدا تەمٸرجول بويىمەن جٷرگەن 15 جاستاعى جاسٶسپٸرٸم ۆاگوننىڭ ٷستٸنە شىعىپ, اۋىر جاراقات الدى. ونى كەرنەۋٸ 27 مىڭ ۆولتتان اساتىن ەلەكتر توگى سوققان, دەپ حابارلايدى ult.kz.
وقيعا بولعان كٷنٸ جاسٶسپٸرٸم دوستارىمەن بٸرگە سەرۋەندەپ جٷرگەن.
"ناش كوستاناي" پورتالىنىڭ جازۋىنشا, بالالار ٷيگە باراتىن جولدى قىسقارتۋ ٷشٸن تەمٸرجول بويىمەن جٷرگەن. سول جەردە پويىزدى كٶرٸپ, سۋرەتكە تٷسپەك بولعان.
جاسٶسپٸرٸمنٸڭ ايتۋىنشا, ول ۆاگوننىڭ تٶبەسٸنە وتىرىپ, دوسى سۋرەتكە تٷسٸرگەن. كەيٸن ورنىنان تۇرعان سەتتە ەلەكتر دوعاسى سوعىپ, سوققىدان شامامەن ەكٸ مەتر جەرگە ۇشىپ تٷسكەن.
توق سوققاننان كەيٸن جاسٶسپٸرٸم ەسٸنەن تانىپ قالعان. ەسٸن جيعان سوڭ ٷيٸنە ٶز بەتٸمەن بارماق بولعانىمەن, وقيعا ورنىنا جەتكەن مەديتسينا قىزمەتكەرلەرٸ وعان العاشقى كٶمەك كٶرسەتكەن.
جاسٶسپٸرٸم وبلىستىق بالالار اۋرۋحاناسىنىڭ تراۆماتولوگييا بٶلٸمٸنە اۋىر جاعدايدا جەتكٸزٸلدٸ. ونىڭ دەنەسٸنٸڭ 60 پايىزدان استامىن كٷيٸك شالعان.
تراۆماتولوگ-ورتوپەد ميراس ەلجاسوۆتىڭ ايتۋىنشا, جاسٶسپٸرٸم بٸردەن جانساقتاۋ بٶلٸمٸنە جاتقىزىلىپ, وندا شامامەن بٸر جارىم اي ەم العان.
«باقىتىمىزعا وراي, ونىڭ قولى مەن اياعىن ساقتاپ قالا الدىق», – دەدٸ دەرٸگەر.
مامان مۇنداي ەلەكتر جاراقاتىنىڭ اسا قاۋٸپتٸ ەكەنٸن اتاپ ٶتتٸ. ونىڭ ايتۋىنشا, مۇنداي جاعدايدا امان قالۋ مٷمكٸندٸگٸ ٶتە تٶمەن.
قازٸر جاسٶسپٸرٸم جانساقتاۋ بٶلٸمٸنەن پالاتاعا اۋىستىرىلدى. الايدا ونى اۋرۋحانادان شىعارۋعا ەلٸ ەرتە. دەرٸگەرلەردٸڭ بولجامىنشا, ەمدەۋ شارالارى تاعى 2-3 اپتاعا سوزىلۋى مٷمكٸن.
