Qazaqstanda alaiaqtar Qarjylyq monitoring agenttiginiń (QMA) atyn jamylyp, azamattardyń jeke jáne bank derekterin qolǵa túsirýge tyrysýda, dep habarlaidy ult.kz.
QMA-ǵa memlekettik organdardyń birine Agenttik atynan jiberilgen kezekti jalǵan hat týraly aqparat túsken. Qujatta qaskóiler belgili bir azamatqa qatysty tekserý júrgizilip jatqanyn alǵa tartyp, onyń minezdemesi men ózge de jeke málimetterin suratqan.
Agenttik mundai alaiaqtyq áreketterdiń buǵan deiin de tirkelgenin eskertti. Qaskóiler áýeli QMA atynan ázirlengen jalǵan resmi hat joldap, keiin telefon nemese messendjer arqyly habarlasady. Ózderin Agenttik qyzmetkeri retinde tanystyrǵan olar azamattardyń jeke jáne bank derekterin alýǵa nemese aqsha aýdarýdy talap etýge tyrysqan.
QMA azamattardy mundai habarlamalarǵa saqtyqpen qaraýǵa shaqyrdy. Agenttik qyzmetkerleri telefon arqyly bank shotynyń derekterin berýdi nemese aqsha aýdarýdy talap etpeidi.
Sondai-aq qujatta memlekettik organnyń logotipi, móri nemese qoltańbasynyń bolýy onyń shynaiy ekenine kepildik bermeidi.
Kúmándi hat alǵan jaǵdaida onyń túpnusqalyǵyn QMA-nyń resmi bailanys arnalary arqyly tekserý qajet. Beitanys adamdarǵa jeke jáne bank derekterin bermei, olardyń nusqaýymen aqsha aýdarýǵa bolmaidy.
Kúmán týyndaǵan jaǵdaida QMA-nyń 1458 Call-ortalyǵyna nemese +7 (7172) 70-84-79 nómiri arqyly Kezekshi bólimge habarlasýǵa bolady.
Aita keteiik, buǵan deiin Túrkistanda ózin QMA qyzmetkerleri retinde tanystyrǵan alaiaqtardyń azamattan 15 mln teńge bopsalaǵany habarlanǵan bolatyn.
