Biologiialyq qaýipsizdik máseleleri jónindegi ǵylymi-zertteý institýtynyń bas direktory Kúnsulý Zakariia «QazVac» otandyq vaktsinasy klinikalyq synaǵynyń 3-satysy qashan aiaqtalatynyn aitty, dep habarlaidy "Ult aqparat".
«Qazirgi ýaqytta dúniejúzinde klinikalyq synaqtyń 1, 2 jáne 3-satysynan ótip jatqan vaktsinalardy «kandidattyq vaktsinalar» dep ataidy. Olardyń sany 200-den asady. Sonyń ishinde bizdiń vaktsinamyz 14-shi bolyp klinikalyq zertteýge shyqty jáne álemde 5-shi bolyp adamdarǵa egýge ruqsat aldy. Vaktsinamyz inaktivtelgen, iaǵni óltirilgen virýs tehnologiiasy boiynsha ázirlenedi. Bul tehnologiianyń qoldanylǵanyna 60 jyldan astam ýaqyt ótti jáne ol tolyq zerttelgen. Onyń ishindegi quram-bólik zattar burynnan belgili jáne ony birneshe býyn urpaq alǵan. Balalarǵa egiletin kóptegen vaktsina osy tehnologiia boiynsha ázirlenedi. Iaǵni, onyń quram-bólikteri úlken qater týdyrmaidy, zararsyz. Aǵzaǵa esh qateri joq. Bul tehnologiiaǵa tek SARS-CoV-2, koronavirýs aýrýyn qozdyrtatyn virýs qana qosylady», - dedi Kúnsulý Zakariia Bilim jáne ǵylym ministrliginiń Instagram-paraqshasynda ótken onlain brifing barysynda.
Onyń aitýynsha, álemde ázirlenip, paidalanýǵa berilgen vaktsinalardyń eshqaisysy klinikalyq synaqtyń úshinshi satysynan ótpegen.
«Zertteýler áli jalǵasyp jatyr. Bireýleri klinikalyq synaqtyń 3-satysyna endi shyǵady. Mysaly, «Spýtnika V» osy jyldyń mamyr aiynda klinikalyq synaqtyń 3-satysynan tolyq ótedi. Al «QazVac» vaktsinamyzǵa osy jyldyń shilde aiynda klinikalyq synaqtyń 3-satysy aiaqtalady. Sol ýaqytta ózimizdiń zertteýlerdiń tolyq nátijesin alamyz», - dedi ol.
