QR Bilim jáne ǵylym vitse-ministri Miras Dáýlenov «QAZVAC» otandyq vaktsinasyn klinikalyq zertteýdiń aralyq nátijelerin baiandady, dep habarlaidy QazAqparat.
«Qazirgi ýaqytta 244 eriktige jasalǵan klinikalyq zertteýlerdiń 1-2 fazasy aiaqtalýda jáne 3000 eriktige jasalǵan úshinshi kezeńniń klinikalyq zertteýleriniń 50%-y 15 sáýirde aiaqtalady. Klinikalyq zertteýler hattamasyna jáne densaýlyq saqtaý ministrliginiń, DDU talaptaryna sáikes klinikalyq zertteýler júrgizýdiń belgili bir merzimderi bar ekenin túsinýimiz kerek. Al klinikalyq zertteýlerdiń úshinshi kezeńinde kem degende 70 kún bolýy kerek. Sondyqtan munda bárimiz shydamdylyq tanytyp, túpkilikti nátijeni kútýimiz kerek. Degenmen, 15 sáýirde úshinshi kezeńniń 50%-yna qol jetkiziletindikten, búgin biz atqarylǵan jumystyń keibir nátijelerin bóliskimiz keledi», - dedi vitse-ministr Ortalyq kommýnikatsiialar qyzmetinde ótken baspasóz máslihatynda.
Ekpe alǵan eriktiler vaktsinanyń ózin de, platsebosyn da saldyrǵan.
«Iaǵni, bizde «soqyr» randomizatsiialanǵan zertteý qoldanylady, eriktiniń ózi bul jaǵdaida naqty vaktsina nemese platsebo alǵanyn bilmeidi, tiisinshe ózderi mán-jaidy bilmeiinshe eriktiler týraly málimetterdi kórsete almaimyz, tipti men ministrdiń orynbasary retinde vaktsinany nemese platsebony kim alǵanyn bilmeimin. Munyń bárin derekterdi jariialap, qujattardy Densaýlyq saqtaý ministrligine bergennen keiin bilemiz. Densaýlyq saqtaý ministrligi bekitken hattamaǵa sáikes barlyǵy qalypty túrde júrip jatyr. Almaty jáne Taraz qalalarynda tiisti GCP sertifikattary bar klinikalarda zertteý júrip jatyr. Barlyq eriktiler apta saiyn dárigerlerge densaýlyǵynyń jai-kúii týraly habarlaidy, klinikalarǵa únemi kelip turady, olardy dárigerler baqylaidy jáne eriktilerden virýsqa tán antidenelerge de, beitaraptandyratyn antidenelerge de synama alynady», - dep túsindirdi Dáýlenov.
