Eks-prezident áýletine qatysy bar adamdar kezekti márte jurtshylyqty tańǵaldyrdy. Ulysmedia.kz redaktsiiasynyń habarlaýynsha, Dariǵa Nazarbaevanyń qudasy basqaryp otyrǵan kompaniia áleýmettik jelide jazylǵan ár negativke oń pikirmen jaýap qatqandarǵa joǵary aqy tólemek.
Iá, bul másele tikelei QazExpoCongress Ulttyq kompaniiasyn 2020 jyldan bastap basqaryp kele jatqan Allen Shaijúnisovke qatysty bolyp otyr. Nazarbaev áýletimen qandai jaqyndyǵy bar deseńiz, 2018 jyly onyń jieni Dalen Shaijúnisov Dariǵa Nazarbaevanyń qyzyna úilendi.
Alaida, Shaijúnisov qudalarynan tiisti sabaq almaǵan sekildi. Óitkeni, ol qyzyldy-jasyldy kórkem sóz ben maqtanǵa qumar bolyp shyqty. QazExpoCongress kompaniiasy BAQ-taǵy monitoring pen SMM qyzmetin paidalaný boiynsha zańǵa sáikes elimizdegi kompaniialardyń birimen kelisimshart jasasqan. Biraq onyń bir tarmaǵynda mynadai qyzyqty baiqadyq. Máselen, osy tapsyrysty oryndaýshylar jelide jazylǵan jaǵymsyz pikirdi 20 unamdy kommentariimen almastyrýy qajet. Sondai-aq tapsyrys berýshiniń keisinde 1 saǵat ishinde 50 unamdy pikir men árqaisysyna reaktsiia arqyly belgilenetin lúpil bolýy tiis.
Negativ pikir men BAQ-ta kompaniia qyzmetine qatysty jaǵymsyz jazba jariialanǵanyn tapsyrys oryndaýshy tarap kúni-túni baqylap, olqylyqtyń ornyn der kezinde jaýyp otyrýǵa mindetteledi. Al eger bul júie tiimsiz bolsa, 24/7 rejimde arnaiy mamandar óz baqylaýyna alady. Óte jaýapty jumys, árine. Biraq qyzmet quny da az emes. Tapsyrys berýshi bul jumysty júrgizýge jylyna 6 mln teńge bólip otyrady.
Shynynda da búginde PR qyzmetine júginetin kompaniia az emes. Problemalar árqaisysynda kezdesedi. Biraq ony der kezinde sheshý tikelei tapsyrys berýshi taraptyń abyroiyna áser etedi.
Al 24/7 rejimde ár jaǵymsyz kommentariidi baqylap, jaýap berip, alańdaýshylyq bildiretindei QazExpoCongress kompaniiasynyń basyna ne kún týdy degen oi keledi.
Degenmen taiaqtyń eki ushy bar degendei, QazExpoCongress «Astana EKSPO-2017» kompaniiasynyń ornyn basqan bolatyn. Ár nárseden sekem alýdyń mánisi osy bolar dep topshylaimyz. Iá, biz baiandap otyrǵan ekinshi kompaniia 2015 jyly elimizdegi eń iri jemqorlyq deregi boiynsha daýdyń ortasynda qaldy. Al eks-tóraǵasy Talǵat Ermegiiaev pen "Astana EKSPO-2017" kompaniiasyndaǵy departamenttiń eks-basqarýshysy Qajymurat Úsenov temir torǵa toǵytyldy.
Al eń qyzyǵy Allen Shaijúnisov 2015 jyly atalǵan laýazymdy tulǵalarmen qatar «Astana EKSPO-2017» kompaniiasynda Marketing boiynsha is júrgizetin departamenttiń basqarýshy direktory boldy. Biraq jemqorlyq isine qatysy joq bolyp shyqty. Oǵan deiin ol Mańǵystaý oblysy ákimdiginde apparat basshysynyń orynbasary, «Samruq-Qazyna Kontrakt» JShS basqarýshy direktory, QR Deneshynyqtyrý jáne Sport agenttiginde Tóraǵanyń orynbasary qyzmetterin atqardy.
2019 jyly "Astana EKSPO-2017" jańa ataý alyp, onyń aktsiialarynyń paketin QR Saýda jáne integratsiia ministrligi óz qolyna aldy. Boljam boiynsha QazExpoCongress kompaniiasy memlekettik jáne halyqaralyq saýda-ekonomika salasyndaǵy joǵary deńgeidegi is-sharalardy uiymdastyratyn biregei operatorǵa ainalýy tiis bolatyn.
Búginde kompaniia Nur Alem mýzeiin óz baqylaýynda ustap, halyqaralyq deńgeidegi túrli is-sharalardy uiymdastyrady. Aitpaqshy, dál osy kompaniia EXPO-2021 kórmesindegi qazaqstandyq pavilondy ashyp, 2019 jyly Astana Economic Forum is-sharasyn ótkizgen edi.
BAQ-ta jariialanǵan túrli pikirdi saralap kórsek, Dýbaida ashylǵan pavilon kópshilik kóńilinen shyqqandai.Al túsiniksiz bolyp otyrǵan bir jait qana bar. Sonda QazExpoCongress Ulttyq kompaniiasynyń basshylyǵy táýlik boiy úzdiksiz qai jaýmen kúresip otyr? Qyzyq!
