Búgin QR Ǵylym jáne joǵary bilim ministrligi men Halyqaralyq dziýdo federatsiiasy (IJF) arasynda yntymaqtastyq týraly memorandýmǵa qol qoiyldy. Qujatqa QR Ǵylym jáne joǵary bilim ministri Saiasat Nurbek pen IJF prezidenti Mariýs Vizer qol qoidy, dep habarlaidy ult.kz.
Memorandým stýdentter arasynda dziýdony damytý men keńinen nasihattaýǵa baǵyttalǵan birlesken bastamalardy júzege asyrýdy kózdeidi. Sonymen qatar qujat sporttyq infraqurylymdy jetildirýdi, sporttyq rezerv daiarlaýdy, dene shynyqtyrý jáne sport salasyndaǵy oqytýshylar men mamandardyń biliktiligin arttyrýdy qamtidy.
Yntymaqtastyq aiasynda dziýdo baǵdarlamalaryn joǵary oqý oryndary men kolledjderdiń bilim berý úderisine kezeń-kezeńimen engizý, jarystar uiymdastyrý, stýdenttik ligalar qurý jáne sporttyq infraqurylymdy damytý josparlanyp otyr.
Bilim berý uiymdarynyń materialdyq-tehnikalyq bazasyn nyǵaitýǵa, sporttyq qural-jabdyqtarmen, tatamimen jáne dziýdomen ainalysýǵa arnalǵan arnaiy ekipirovkamen qamtamasyz etýge erekshe nazar aýdarylady.
Baǵdarlamanyń operatory retinde Jenys International Sports Foundation qory aiqyndaldy. Qor jobany qarjylandyryp, ony iske asyrý jumystaryn úilestiredi.
Taraptar memorandýmdy iske asyrý buqaralyq sportty damytýdaǵy mańyzdy qadam bolatynyn jáne jastardy dziýdomen ainalysýǵa ári salaýatty ómir saltyn ustanýǵa yntalandyratyn qosymsha múmkindikter qalyptastyratynyn atap ótti.
