Jańa oqý jylynan bastap mektepterde jańa mindetti pánder engiziledi, olardyń ishinde «Konstitýtsiia negizderi» jáne «Jeke qaýipsizdik» bar, dep habarlaidy ult.kz.
Úkimet otyrysynda jańa Konstitýtsiia normalaryna sáikes oqý josparlary men standarttaryn qaita qaraý týraly Oqý-aǵartý ministri Juldyz Súleimenova habarlady.
Onyń aitýynsha, qazir teoriiany jattaýǵa ǵana emes, jaýapkershilikti tárbieleýge jáne qazirgi álemde qaýipsiz ómir súrýge basa nazar aýdarylady. 5-7 synyp oqýshylary úshin «Konstitýtsiia negizderi» páni engiziledi, onda oqýshylar Qazaqstan Respýblikasynyń konstitýtsiialyq qurylysy, azamattardyń quqyqtary men mindetteri, memlekettik basqarý qaǵidattary jáne quqyqtyq mádeniet negizderi týraly júieli bilim alady. 8–11-synyptarda «Zań men tártip» mindetti kýrsy oqytylady. Bul pánniń negizgi maqsaty – quqyqtyq sanany nyǵaitý, quqyq buzýshylyqtyń aldyn alý, zań talaptaryn qurmetteý mádenietin qalyptastyrý jáne azamattyq jaýapkershilikti arttyrý. Sonymen birge 5–11-synyptarda «Jeke qaýipsizdik» mindetti kýrsy engiziledi. Bul oqýshylardyń ómirlik qaýipsizdik mádenietin qalyptastyrýmen qatar, aqparattyq qaýipsizdik, kibergigiena, tótenshe jaǵdailarda áreket etý jáne qaýipterdiń aldyn alý boiynsha praktikalyq daǵdylaryn damytýǵa baǵyttalady.
«Jańartylǵan bilim mazmuny eń aldymen tulǵanyń jan-jaqty damýyna, irgeli bilimdi nyǵaitýǵa, azamattyq jaýapkershilikti qalyptastyrýǵa jáne zamanaýi quzyretterdi damytýǵa baǵyttalady. Sonymen qatar tárbielik komponenttiń mazmuny edáýir kúsheitiledi. Bilim berý júiesine «Adal azamat» biryńǵai tárbie baǵdarlamasynyń qundylyqtary, «Zań men tártip» qaǵidaty, «Taza Qazaqstan» jalpyulttyq bastamasy jáne jańa Konstitýtsiianyń negizgi ideialary men qundylyqtary tolyq engiziletin bolady. Osylaisha mektep tek bilim beretin uiym ǵana emes, zańǵa qurmetpen qaraityn, eńbekti baǵalaityn, memleket pen qoǵam aldyndaǵy jaýapkershiligin sezinetin azamattardy qalyptastyratyn ortaǵa ainalady», — dep atap ótti ministr.
